RB搬竇夾Band 擾民冇有怕
樂隊RubberBand（RB）踏足娛樂圈六年，終於捱出頭，除年底舉行首個紅館演唱會外，四子早前喬遷之喜，搬往比舊Band房面積大一倍的新工作室，投資逾10萬為新竇加設隔音設備。此外，主音６號宣布會於11月11日結婚。
RB入行時曾坦言為音樂理想而放棄高薪厚職，過着節衣縮食的日子，幸好艱苦經營下，四子終得到回報，早前便公布12月9日舉行第一次紅館演唱會。近年收入漸豐厚的RB，幾個月前覓得筍盤可以搬新竇，由本來僅得400呎的Band房，現升呢為800呎，令工作空間變得寬敞。
租金便宜
問是否近年豬籠入水，所以有本錢換大Band房？成員阿偉說：「咁又唔係喎！反而啲租仲平咗。因為以前喺尖沙咀，依家喺九龍灣工業區。」他又稱新Band房沒有豪裝，但就斥資逾10萬加設隔音，可惜仍遭鄰居投訴：「入咗伙幾日，管理員就話樓下寫字樓投訴我哋好嘈，但我落樓聽又唔係太嘈。（要細細聲夾Band？）咁又唔使喎！因為同佢哋（投訴者）傾完偈後，大家Friend咗，冇再收到投訴。」
唔想鋪張
除了喬遷之喜，主音6號亦有喜事宣布，他繼「剛晶」、杜德偉後，成為第3對於11月11日結婚的星級新人，不過因6號作風低調，只邀請兩家的親友及雷頌德及RB樂隊成員阿偉、阿正及泥鯭飲喜酒。昨日6號接受訪問時承認結婚：「係呀，不過唔好講啦，我要保護另一半同家人，唔想鋪張，我又半紅不黑，（公開婚訊，可以幫演唱會做宣傳同賺贊助喎？）有人提議過，但我唔想，我寧願唔要贊助，辛苦啲靠自己。」6號又否認突然結婚是「雙喜臨門」。
文：音樂組