湯寶如精挑猛男圓夢
昔日「寶麗金三花」之一的湯寶如（湯記），入行20年終於一嘗紅館夢，將於12月22日在紅館舉行處女個唱《湯寶如20年零一夜狂歡演唱會2012》。狀態大勇的湯記昨日以黑色透視衫出席記招，隱約見到個肚腩仔，她直認減肥仍須努力：「依家日日做Gym同排舞o架喇，減多6、7磅啦！」
男友冇詐型
湯記又透露會以超性感歌衫配以勁歌熱舞︰「唔Sexy唔好睇，歌衫會大Deep V同大露背，仲會唱好多快歌，希望大家同我一齊跳！」男友可有詐型其造型太性感？她笑說︰「冇喎！今次啲Dancer仲清一色猛男，全部我揀嘅！萬一啲女Dancer靚過我又後生過我咪死得！」
帶囝囝見識
湯記又稱「寶麗金三花」將在個唱合體，她已請來劉小慧和黎瑞恩做嘉賓，不過她失望地表示未能請到歌神張學友現身︰「我都好想佢嚟，但佢唔得閒呀。（叫佢拍段片畀你？）都可以諗諗喎！」她又指囝囝尚未知道其歌手身份，不過到綵排時就會帶他去見識一吓。
文：音樂組