錢國偉撥火：撩高手過招

最近電視圈出現所謂嘅「大戰」，我想話我喺TVB咁多年，點都係我娘家，栽培我出嚟，所以我唔可以忘本，之前Now同有線有搵我，都冇成事，至於王維基嘅城市電訊就傾咗幾句，可能佢仲搞緊話劇部，未去到綜藝部啦！不過，我覺得有競爭係好事，唔好一台獨大，高手都會寂寞o架嘛！近年有人鬧TVB劇集是是但但，其實仲有一定水準嘅，師奶都識揀o架！但有多啲對手會更加好，你出槍我咪出大炮，依家人哋槍都冇，咁我刀仔都贏啦！我唔會話TVB永遠打不死，因為唔同時代有唔同潮流，我覺得TVB可以製作更出色嘅節目，例如大騷、《勁歌金曲》，製作冇問題，只係有啲人用唔到，如果打破到呢個僵局就好。

抄得好證明成功

近年TVB搞綜藝節目都肯用唔同嘅新方法，仲愈來愈多Budget！有人話抄襲，其實創作係周而復始，難免有類似，可能大家細細個吸收同樣嘅嘢，之後又不約而同拎出嚟！我唔反對參考人哋，但唔可以照「Dup」，要有新元素甚至更好！最近我同古巨基、鄭伊健二次創作《HongKong Style》多人讚，除咗好笑，我哋仲加咗好多地道嘢，六合彩、執膠粒、電車，大家都睇得開心，證明成功囉！另外就係，唔通外國人一定唔會抄中國人？《全美一叮》其實係《殘酷一叮》之後o架喎！外國依家好多劇集耍中國拳，橋段根本就係80年代港產片，咁算唔算抄？

冇害人懶理投訴

我承認我啲節目好多人投訴，但我睇得好開，又冇傷害人，我哋做娛樂工作嘅，最緊要係好唔好睇先？好唔好笑先？《獎門人》掟幾隻雞蛋，就投訴浪費食物，但日日有幾多香港人食自助餐食剩嘢？如果覺得對非洲人唔公平，可以用其他方法幫忙，而唔係投訴。（完）

口述：錢國偉

筆錄：影視組