崔建邦重返《勁歌》望收視升
藝人古明華（古佬）、崔建邦（Amigo）、應屆港姐季軍朱千雪與歌手王菀之等前晚在電視城為節目《勁歌金曲》錄影，第一次擔任節目主持的朱千雪更要表演鋼琴，她坦言雖然有少許緊張，但不怕兩者不能兼顧︰「我本身8級琴，所以唔驚兼顧唔嚟。」而同是主持的Amigo亦大讚朱千雪勤力，談到終於回歸《勁歌》，Amigo亦感慨表示︰「我3年前離開《勁歌》依家又返嚟呢個舞台，真係百般滋味在心頭。（3年前收視比依家好？）我冇深究過，希望我返嚟做，收視會好啲。」
至於視張國榮為偶像的古明華亦會上台獻唱哥哥的金曲《風繼續吹》，古佬表示曾有幸跟偶像合作：「當年我有幫電影《倩女幽魂》配音，哥哥亦有上嚟配佢自己嗰part，佢冇架子，叫外賣時仲親口問我哋想食咩。」