羅敏莊誕7.3磅「長腿姐姐」
陳國邦與太太羅敏莊的女兒陳禛出世了！榮升爸爸的陳國邦昨開心公布重7.3磅的囡囡外貌似老婆，更獲護士大讚是位「長腿姐姐」！他又直言日後會追多個BB陪女兒。
藝人羅敏莊（Mimi）昨日上午8時許在浸會醫院剖腹誕下女兒陳禛（英文名Jan），重7.3磅，眼大大之餘，更獲護士大讚擁一雙「修長美腿」！問Mimi可有激動落淚？他說：「佢有抹眼囉，仲話人哋BB喊好煩，但自己BB嘅喊聲就覺得好可愛。我都有入去剪臍帶，最緊張係驚把鉸剪跣手篤親BB！（追多個？）有諗過1、2年後再生，等囡囡多個伴成長，不過隨遇而安啦。」
改名陳禛 就晒老婆
問BB似爸爸還是媽媽，陳國邦笑言有8成人認為愛女似媽咪，並謂為BB女取的中英文名，是因老婆喜歡李小龍於電影《精武門》飾演的角色「陳真」及Jan（林海峰），果然是圈中「愛妻號」。初為人父的陳國邦透露老婆與奶奶通電話時喊爆，又指二人均不是後生仔，故身心已成熟去迎接小生命。
12月復工 內地搵銀
對於Mimi產後何時復出，陳國邦稱太太不會減少幕前工作，12月更會復工到內地表演，並希望日後進出工作一家三口都能黐到實，讓囡囡多接觸外界，擴闊視野。問Mimi可會積極收身示人？他說：「收身會減少營養，而佢會餵人奶，況且唱歌唔收身都唱到，佢唔會介意。」另外，Mimi昨午在微博上載產後臥床舉V手照，並留言「任務完成！」公布喜訊，十分抵死。
文：影視組