錢國偉︰克勤係七仔
金牌監製錢國偉（Wilson）在圈中打滾多年長袖善舞，人緣極好甚多老友！他表示當年與李克勤、鄭伊健好感情得結義兄弟，並指克勤在眾人中排第七，所以被稱「七仔勤」，他並自爆是克勤與太太盧淑儀的媒人。
好慶幸我有好多朋友，朋友係我第二生命，圈入面我同好多人都熟，例如李克勤、鄭伊健、林曉峰，近年開始做演唱會，就friend埋古巨基、Big Four、側田等，仲有我好多年都有參與製作港姐競選，所以都識唔少港姐。
當年我由兒童組轉做音樂組，頭幾個ＭＶ都同克勤合作，我仲憑佢嘅《紅日》得到最佳音樂錄影帶獎，呢個獎畀到唔少信心我，之後我哋合作《殘酷一叮》三輯都幾好成績，馬來西亞仲買咗版權添！當年我同克勤、伊健、吳婉芳、李家聲、梁佩瑚等特別好感情，一班人仲結義，我排第六，克勤排第七，所以佢係「七仔勤」，當時成日一班人去玩，假如邊個有親戚去世，都一班人去醫院陪佢，非常團結，到今時今日仲有聚會o架！
同伊健齊撞車
講個秘密畀大家知，其實我算係克勤媒人，當年克勤做嘉賓嘅港姐係我負責，當時佢已經覺得有個女仔（克勤現任太太盧淑儀）好靚，我就安排佢帶單數佳麗囉！應該唔多唔少幫到佢，所以佢爭我一個漢堡包o架！
記得克勤第一次喺紅磡有一張大海報，我哋成班兄弟專登去影低佢，但我同伊健就係咁撞車喇！當日由伊健揸車，佢啱啱買咗架白色日本新車，因為大家都好攰，佢揸揸吓車竟然瞓咗！終於撞咗落前面架車度，撞到反埋車，當年我身手好好o架！兩個人一齊爬出架車，好彩我哋戴帽隔咗玻璃碎所以冇咩事，哈哈！之後伊健就開始紅喇！我哋都算生死之交，當年掛住買玩具，冇錢食飯，一碗河粉兩份食！
口述：錢國偉
筆錄：影視組