祖兒憤怒鳥 紅爆紮紮跳
樂壇天后容祖兒（Joey）以一頭鮮紅頭髮，化身成紅噹噹的Angry Birds，更爬上成道門咁高嘅椏叉為服裝品牌拍攝硬照。原來Joey本身是Angry Birds的狂迷，變身後的她更在片場紮紮跳，十足Angry Birds上身！
Joey再度以亞太區代言人身份為服裝品牌拍硬照，以出位的化妝及造型襯出今年冬季至潮百搭Look。為了變身做Angry Birds，Joey花上3個小時又染髮又駁髮，甚至將眼眉都噴上鮮紅色，加上紅唇和鮮紅指甲，十足一隻女版Angry Birds！
已打爆機
變身後的Joey恍如小鳥上身，不斷在片場紮紮跳，原來她本身是Angry Birds的超級fans：「當我知道有得扮Angry Birds真係好興奮，因為我好鍾意呢個Game。我喺遊戲啱啱出嗰時已經打爆機！我自己亦都好鍾意今日呢個紅髮造型，因為我都好鍾意紅色！」
對腳好攰
冇椏叉又點發射Angry Birds呢？為求逼真，場地更搭出一個1.8米高的椏叉和2米高的月球布景裝置，Joey興奮地表示：「今次廣告拍攝好刺激，要喺個咁高嘅椏叉上面擺高難度Pose，過程入面仲出現好多驚險場面，但係又要扮到好自在咁，真係好考工夫。同埋我又要不斷跑跑跳跳，去扮一隻好活潑嘅雀仔，對腳真係好攰，不過出嚟嘅效果大家都好滿意！」
文：音樂組