Kary再踏紅館 邀學友Sing援
吳雨霏（Kary）將於明年1月8日再在紅館舉行演唱會，成為2013年紅館首位女歌手開騷。Kary昨日性感現身記者會，她預先張揚會於個唱表演高難度動作，並想邀偶像張學友來任個唱嘉賓。
「吳雨霏The Present Concert」昨日在尖沙咀露天停車場舉行發布會，Kary以白色毛毛外套大騷半邊黑色Bra Top，加上修長索腿，性感迷人。眾人於酒店露台進行氣球剪綵儀式，寓意Kary事業一飛沖天。
Cookies難合體
昨日是首天門票公開發售，Kary稱早上嘗試上網買飛，雖遇上網絡癱瘓，但代表反應熱烈，故希望加場。她又稱舞台服飾交由形象師馬天佑主理，因又跳又唱，不宜太過性感。提到她上次紅館開騷以倒吊形式揭開序幕，她笑言今次會繼續高難度示人。問可會找前Cookies任嘉賓再度合體？Kary指其中一位成員蒲茜兒（Serena）有身孕，相信合體有難度，反而想邀偶像張學友：「之前我做騷，學友都有送花籃。（叫公司出馬囉！）係喎！其實我入咗環球，一次都未見過學友，所以我都好希望呀！」
爆穀衫阻艷遇
上周六晚Kary被拍得化身「爆穀女郎」，與好姊妹鄧麗欣及區文詩到蘭桂坊慶祝萬聖節，她謂：「係Girl's Night。（同男友仲冷戰緊？）冇呀！咁成班女仔去玩，咁啱又喺街撞到囉！」記者笑她的爆穀衫非常搶鏡，吸引老外喪摷，Kary即說：「唔係摷，係攞！我都有怒睥佢，我貼咗好多真爆穀喺度。（有冇艷遇？）冇啦！爆穀盒太阻碇，行到邊撞到撞。（下次少布啲？）下年由頭包到落去啦，等大家認唔到。」她又自爆回家後發現爆穀衫內有卡片，但沒細看便丟掉。
文：音樂組