79歲煇哥出巡港姐爭黐運
「香港樂壇教父」顧嘉煇（煇哥）首個個唱宣布二度加開至6場，在12月5日舉行。79歲的煇哥寶刀未老，人氣之強，連年僅20多歲的出爐港姐也被他吸引，齊齊化身小fans排隊等樂壇大師影合照，而煇哥更鴻運當頭，首次到馬場落注便即中彩。
煇哥昨日帶同兒子Ken、外孫女Pamela、演唱會出品人丘亞葵、歌手張德蘭及夫婿齊出席假沙田馬場舉行的《東方表行沙田錦標賽》。
丘亞葵宣布《顧嘉煇大師經典演唱會2012》反應超熱烈，經多番爭取下，鐵定再加12月5日最後一場，總數共6場。煇哥對於再度「添食」自信地說：「我都預咗啦，開6場唔怕辛苦，因為我都係負責開場嗰part啫，之後就睇騷。」煇哥可謂行運一條龍，第一次入馬場小賭試運氣，以50元下注，雖然連本帶利中了150蚊，一樣開心得他急叫乖孫女幫他攞彩金，還自爆曾想捧頗有歌唱潛質的Pamela做歌星，可惜乖孫無意入行。
煇哥在貴賓廳內大受嘉賓歡迎，見慕名者絡驛不絕相邀合照，令有求必應的煇哥連用餐的時間也沒有，人群中見三位出爐港姐包括冠軍張名雅、亞軍黃心穎及季軍朱千雪如小fans般排隊輪候，可見現年屆79歲的煇哥魅力沒法擋，老、中、青fans均可一網打盡。
張名雅呻一飛難求
張名雅表示首次見煇哥真人感興奮，雖然煇哥的經典作品風行時，她尚是年幼，但父母均是煇哥的歌迷：「爸爸媽媽成日聽煇哥啲作品，覺得好好聽，（撲唔撲到煇哥個唱飛呀？）冇呀，有飛我一定會捧場。」而黃心穎亦呻買不到煇哥演唱會門票。
文：音樂組