趙世曾餵飽長髮女撩牙回味

趙世曾堅決反對女兒和楊如芯的同性婚姻，揚言出五億招婿，事件令國際傳媒爭相報道，更成為荷里活電影公司拍攝的新題材，對女兒趙式芝感情事狂施壓力，但自己私生活卻繼續風流。

主動為女方鋸扒

前晚8時多趙世曾趁重陽節假期出街食飯，身邊不見拍拖兩年多的隋麗娜，卻換來另一名長髮披肩，穿上透視裝的年輕貌美的新歡。

有新女友登場，趙世曾是夜精神奕奕，穿上西裝束起袖，相當有活力地和女友步入銅鑼灣一間西餐廳，兩人並肩而坐，由趙世曾負責點菜，兩人邊食邊傾，為氹新歡開心，趙世曾不時主動為對方切牛扒，煙韌地食足個多小時始齊齊離開。只見趙世曾拖實新歡步出，食得飽飽的新歡懶理儀態地當街以脷撩牙，及至司機將名車駛至，趙世曾風度十足地讓新歡上車，兩人齊齊溫馨離開。

趙世曾擸高衫袖，先讓女友上車，風度十足。

趙世曾帶新歡到銅鑼灣鋸扒。

唔怕Lena呷醋

昨日記者致電趙世曾，問到是否有新女友，他風騷地說：「我好多女朋友o架，咁多朋友你講邊個呀？（咁佢叫咩名呀？）唔使啦！普通朋友啫。（但你哋拖手喎？）拖手做好朋友。（咁Lena呢？）佢依家返咗大陸幫我傾嘢，11月返，有時喺香港，有時喺大陸囉，（你唔驚佢呷醋呀？）做得我女朋友係唔會呷醋！（如果真係呷醋呢？）唔會！」

文、攝：追蹤組