霆鋒大步檻過 栢芝：唔會畀衰人咁快死
謝霆鋒於前晚播出的電視節目訪問中驚爆患皮膚癌！霆鋒昨晚與父親謝賢從北京抵港，他神態自若透露現時已完全康復，毋須接受療程。他坦言患病時最擔心兩個寶貝仔Lucas及 Quintus，豈料當他將病況告知前妻張栢芝時，她竟以幽默方式安慰霆鋒：「唔使擔心！個天唔會畀衰人咁快死！」
近年少有接受電視專訪的謝霆鋒，於前晚播出的電視節目《最佳男主角》接受黎芷珊訪問。由於節目有個慣例，每位受訪者都要跟主持人分享一個小秘密，豈料霆鋒這個小秘密竟是自爆患皮膚癌！當他發現左邊頭皮的黑痣變大時才去檢查，當時醫生向他表示不能電走粒痣，及後更發現是黑色素瘤，醫生指是皮膚癌，要立即處理。上月中他入院做手術，將「黑色組織」全部割除，並縫了五針。當時母親狄波拉有陪他入院，反而其父謝賢不知情。
最擔心兩寶貝仔
霆鋒與謝賢昨晚六時許以黑超父子look由北京抵達香港機場，頭戴cap帽、身穿灰色衞衣及牛仔褲的霆鋒，神情輕鬆企定受訪。問身體狀況如何？他說：「我OK，我OK，我冇事！我只不過喺訪問入面講咗呢件事，訪問入面已經講咗冇事。我唔知剪接咗出嚟會係點。」戴了cap帽的他只露出兩邊髮鬢，他表示非為遮傷口，只是頭髮太短。他直言之前沒跟謝賢透露病情：「佢都係今日睇報道先知，反而好多記者朋友打嚟關心我。我喺訪問已經話冇事，有事都唔會講出嚟啦！」
霆鋒坦言得悉患病一刻，腦海有點空白，最擔心是兩個囝囝Lucas及Quintus，所以即時將病情告知前妻張栢芝：「佢好樂觀，仲叫我唔使擔心！話個天唔會畀衰人咁快死！」他再三強調已康復，亦不會請假休息，反而叫現場記者不要大驚小怪。離開時，有途人祝他身體健康，他回道：「大家咁話！」提到電影《低俗喜劇》與他投資的「PO朝霆」出現糾紛一事，他說：「我知！我係公司老闆，但呢啲嘢我唔可以亂講，對方都有同我講唔好意思，惹起不必要麻煩，依家交咗畀海關處理。」之後，他於七時許返抵位於金鐘的寓所柏舍。霆鋒離開機場後不久，車婉婉與霆鋒公司的同事於另一個閘口現身，對於霆鋒患病一事，她只搖頭嘆息，不作回應。
不會減少動作戲
霆鋒發現患皮膚癌，始於三年前剃頭拍電影《十月圍城》時，經理人霍汶希（Mani）發現其頭上有黑痣，但當時霆鋒沒理會。至近期再剪短頭髮拍戲，Mani發現他的黑痣變大，才令他的起心肝去看醫生及做手術。Mani昨接受電話訪問時，指霆鋒傷口已埋，暫不影響工作，下月中將拍郭子健新戲演消防員，又會接受消防訓練，亦不會減動作戲。她又指霆鋒手術前無特別立平安紙。栢芝經理人周小姐則指涉及霆鋒的私人事，故不作回應。
除了自爆患病外，霆鋒於《最》訪問內含淚訴說，覺得自己最失敗的地方，是足足13年沒與家人同枱食飯，故有一次與父母及謝婷婷食飯時，婷婷說了一句「爸爸媽咪阿哥食飯」，令他哭了出來。
文：專案組
攝：追蹤組