江若琳走過地獄開竅重生
少男殺手江若琳（Elanne）5年前憑煞食大眼look出道，當時只有20歲的她隨即捲入整容疑雲及被誤傳與唱片公司老闆有緋聞，Elanne曾不堪輿論壓力考慮「縮沙」：「當時覺得好冇天理，好討厭呢個世界，好想退出娛樂圈！」幸最後她懂得開竅「睇化」，重新振作、再戰樂壇做新一代唱作人！
承受壓力好想退出
今次新碟有首自己作曲填詞嘅歌叫《學會快樂》，將出道以嚟做嘢嘅體會、經歷放喺入面。入行前半段其實幾唔開心，因為成日喺出面一個人做嘢好孤單，根本唔知道下一個方向係點，瞓瞓吓覺都唔知喺邊一個城市嘅酒店，又唔知將會飛去邊，覺得自己好寂寞。
加上2007年出道時真係好大壓力，嗰時得20歲女，要面對好多新聞，既有報道話我整容，又有人亂寫我同老闆有緋聞，我真係唔識處理。我嗰時諗，點解啲傳媒要無理中傷我，要一個冇做過呢件事嘅人去承受壓力。當時認為呢個圈好恐怖，點解一個人踏踏實實做嘢就冇人過問，反而大家去追看一啲明知係假嘅新聞？嗰時覺得好冇天理，好討厭呢個世界，好想退出娛樂圈！
之後好彩我識自己諗通，由低潮企番起身，以前好在意人哋點講，依家覺得講呢啲嘢嘅人好好笑，佢哋嘅人生都幾無聊，以批評人哋、撩人哋錯處嚟填補自己嘅唔開心，佢哋會仲唔快樂，加上我發現仲有好多好傳媒錫自己！
唔玩大眼仔
至於畀人話整容，其實我覺得呢樣嘢一定會發生喺每個女藝人身上，嗰排冇話題就會拎人哋個樣嚟講。問心，發育時期每個人都有一段「地獄期」，除非真係天生麗質，否則發育期一定會變樣。唔可以拎嗰個時期嘅相嚟對比，我當年係個爆牙妹，但箍完牙之後一定會唔同晒，唔係點會咁多人去箍牙！
加上，以前細個貪玩會拎大眼仔嚟試吓，戴咗又覺得幾靚，但大個咗發現冇需要，依家覺得唔使再靠大眼仔啦，講真我真係好抗拒整容，即使第時老咗都唔會整或者打針。
兩度拍拖煲水居多
靚女自然容易惹桃花，Elanne入行以來身邊的緋聞男友「氹氹轉」，她自爆入行後只拍過兩次拖，但報道所指的緋聞男主角原來全部「點錯相」，實屬煲水新聞！
入行以嚟拍過兩次拖，其中一次係不愉快收場。每段戀情都當學習，呢次失敗咗咪當成就自己第時搵到啱嘅人囉。但之前同我傳過緋聞嘅男仔都冇同我拍過拖，包括之前拍劇識嘅吳卓羲、內地小生袁弘等等，都只係煲水新聞。
同我拍過拖嘅兩個男仔我唔會開名，只會成為秘密，不過佢哋唔係圈中人，只算係半個圈內人啦！不過我鍾意嘅男仔都唔係靚仔，我會以內涵行先。將來我想搵一個男仔會對我同屋企人都好好，又要全力支持我嘅工作，畀到好大嘅包容同埋信任先得，因為喺呢行拍拖真係好需要信任。
好男人難搵
我依家有個小夢想，就係想喺卅歲前買樓結婚，我唔係出身小康之家，自己都係捱窮捱番嚟，所以我好知足，唔渴望做富婆。我同好多香港人一樣都希望買間屋，結婚之後至少生兩個小朋友，我依家都積極搵緊樓，但係覺得真係好貴！不過，最難都係搵個好男人嫁，就算有都要自己等一等，Mr.Right唔會咁易喺身邊行過畀我遇到，要好好等下一個機會，反正我又唔急住要等嗰個人嘅！