JM拖舊愛血拼驚到伸脷
文詠珊（JM）與富貴男友李冠峰愛得難捨難離，去年宣布分手後仍不時出雙入對，雖然JM否認與舊愛阿峰翻撻，前日又發現兩人鬼祟到銅鑼灣潮店拍拖掃減價貨，離開時還刻意前後腳，先行步出的JM發現記者即向阿峰通風報信，繼而同車閃人！
黎明愛將文詠珊與有米男友李冠峰拍拖七年，分手收場，雖然有指阿峰搭上o靚模劉瑋欣，其實JM與舊愛仍未斬纜，不時有影皆雙，實情早已舊情復熾，不過她卻否認與阿峰翻撻。
刻意前後腳
近日時裝店I.T進行藝人大減價，兩人又被撞破鬼祟拍拖前往血拼，身穿白色心心印花上衣、豹紋短裙騷長腿的JM，進入店內即與阿峰分頭行事，未幾兩人已揀了大堆靚衫往付款，埋櫃枱時，JM只顧與身後的阿峰密密斟，未有察覺同場的梁烈唯。付款後，JM刻意與阿峰前後腳走，約下午5時，JM先行步出視察環境，甫見記者即急call尾隨的阿峰通風報信，更刻意放慢腳步過馬路，稍後阿峰與友人手持大袋戰利品步出，並箭步到附近街頭上車，阿峰見到記者驚到伸晒脷，JM在附近兜了一個大圈，最後亦登上阿峰的座駕，由他接載離開。
緣分講感覺
之後JM撇低阿峰出席品牌活動，談到近日婚變的樂基兒（Gaile），她知道Gaile將返港，對方之前生日已買定禮物，待見面時隨時送上。JM說與Gaile幾close，不會因黎明而疏遠她：「其實之前我都有見過黎明，唔覺佢失落，都有SMS慰問，佢回覆話多謝，在心中。」一直死口否認與阿峰翻撻的JM被問到會否介紹女友畀黎生？她說：「不如你哋介紹男友畀我識先，我都未顧得掂自己。（黎生單身，你會唔會鍾意佢呢類型？）緣分要嚟就嚟，我感覺行先。（離過婚男人都唔緊要？）都係感覺行先。（係女仔都唔介意？）總之感覺行先，依家係開放嘅文明社會。」
文、攝：追蹤組