孫佳君：唔介意人工變靚

做人最緊要係有進步，當然希望愈來愈靚，就算係人工嘅改變，我都唔會mind，亦都冇得mind，因為依家太普遍。

我有冇整容？你話呢？唔係我口講一套做一套，係有啲嘢我想保密，能夠令人靚啲嘅方法同秘訣，我做乜要公開？我唔覺得我靚，我反而覺得香港好多女士太追求靚，除咗修身、美容冇其他嘢講，我諗香港女性要學識培養品味，有品味就靚，培養品味唔使一定要去拍賣會睇名畫、聽古典音樂，去圖書館借書睇都得，唔使生活好富裕、唔使花好多錢，不過依家冇乜人睇書o架啦！

欣賞林峯徐子珊

雖然我休息咗一段長時間，但我都有留意新一代嘅男、女演員，好似林峯，我都有睇佢套電視劇《雷霆掃毒》，佢做得好好。之前我出席活動見過羅仲謙，對佢好有印象，佢身形好靚。另外，我都好鍾意台灣嘅柯震東，佢演出好自然，好好笑。我覺得依家新出嚟嘅男仔好講究有樣仲要有身形，同以前好唔同。

放大圖片	孫佳君對湯唯的古典美留下良好印象。	林峯和徐子珊的演技深獲孫佳君讚賞。

女仔我鍾意湯唯，佢畀人感覺好自然、有古典美，《色，戒》搵佢演，casting做得好好。我都幾欣賞徐子珊，佢喺《雷霆掃毒》好搶鏡。仲有冼色麗，佢份人好爽，演戲唔錯，而且仲好靚女！

口述：孫佳君

筆錄：影視組