我喺紐約做攝影師嗰陣，捱過唔少苦。最難忘一次我要搬幾個好重嘅盒，因為動作唔好，最後整傷咗尾龍骨，我足足四日攤咗喺屋企郁唔到！不過好彩嗰陣有個西班牙籍男朋友照顧我，同我一齊睇針灸，睇咗七、八次終於康復。雖然有個人喺身邊照顧係好好，不過我諗我暫時都唔會拍拖，對我有興趣嘅人可以兩年後嚟應徵。
積極行善助他人
我依家啲時間真係好唔夠用，又要工作，又要搵朋友，又要行街扮靚，又要周圍去旅行，仲要陪屋企人。我嫲嫲今年93歲，我好想花多啲時間陪佢。喺十幾年前嘅Eydie會愛情至上，但依家已經轉咗。我唔使畀一個人佔有，反而希望為其他人做多啲嘢，好似做吓慈善活動，以自己影響他人。