戴妮廷遺傳白內障 攝影不言棄

我屋企人畀好大自由度我，從來都唔會干涉我嘅決定，讀high school嗰陣，因為我去咗美國做插班生，啲班全部full晒，誤打誤撞咁揀咗仲有位嘅攝影嚟讀。嗰陣時對影相零認識，爸爸送咗部Nikon F3畀我，我仲拎住部機問老師：「呢部機得唔得？」點知老師話部相機係一部好好嘅機！爸爸又喺財政上資助我，因為買菲林、曬相、去旅行周圍影相，真係要使唔少錢。為咗報答佢，我都做到爸爸對我嘅基本要求，就係完成室內建築嘅大學課程。

擒高擒低一腳踢

我成日都畀人話我係「賺錢買花戴」，以前我真係會好介意，會覺得點解大家要抹殺我嘅努力！雖然我不得不承認我家境唔錯，但係喺影相方面，我的確落咗好多苦工。

Eydie為Alice B.拍攝的黑白照，極富自然美。	Eydie到巴哈馬旅遊充電。	Eydie積極行善，早前更為保護生物計劃「犧牲色相」。

初入行嗰陣，做所有嘢都要一腳踢，物資要自己搬、燈要自己set，成日擒高擒低，不過其實做嘢最緊要係享受過程，我唔會理人哋點講，我成日都講笑咁同人講：「我要賺錢買更多花戴！」做人最緊要活在當下。

Eydie與爸爸感情要好。	胡敏珊與Eydie老友鬼鬼，互相支持。	單身的Eydie，打算兩年後才開展新戀情。

把心一橫轉投餐飲業

Eydie發現患上輕微白內障，一度放棄攝影，轉投餐飲業，不過兜兜轉轉下，令她更確立攝影才是她的最愛。

喺我22歲嗰陣，發現自己遺傳咗家族嘅白內障問題，我喊住同爸爸講「我要盲啦！」嗰時好唔開心，成日喊，覺得自己唔可以再影相，所以我就把心一橫，去咗紐約嘅餐廳做嘢，諗住以後唔再影相。

點知做咗九個月，就發現自己太掛住影相，所以就自己打開本黃頁，逐間逐間model agency打電話，再拎住大學嘅portfolio去面試。當時好出名嘅Ford Model Agency睇完我嘅作品之後，就同我講：「你想影邊個model？你隨便揀啦！」真係令我信心大增！之後就重新踏上我嘅攝影生涯，就算將來真係睇唔到嘢都冇辦法，做人最緊要開心，唔好畀自己後悔。

台灣遇Tori Amos

雖然我同過好多唔同嘅名人、明星合作過，不過要數最令我印象深刻嘅，始終都係我15歲嗰年，我鍾意咗好耐嘅歌手Tori Amos去咗台灣，我因為爸爸嘅關係，長期住喺酒店，而佢嗰次就正正喺我住嗰間酒店表演！我一見到佢，我就發咗癲咁衝上去，直情將企喺我前面高大嘅攝影師推開，到嗰刻我先知原來我見到鍾意嘅嘢，係可以咁不顧一切。

巴黎地鐵偷影

足迹踏遍大江南北的Eydie，笑言最愛做狗仔隊：「我最鍾意喺巴黎嘅地鐵裏面偷影人，本來喺車廂係唔可以影相嘅，我就特登用有pentaprism（五棱鏡）嘅相機，咁我就可以喺機頂望出去影相，影到人哋自然又靚嘅一面，真係好有滿足感！」

平日不修邊幅

Eydie早前與美髮造型品牌Fekkai合作，製作街頭攝影計劃，她更請來「鐘錶界美女」胡敏珊、「第四代Canon甜心」Alice B.等擔任她的模特兒，拍攝了多張散發出她們極富自然美的相片。她笑言自己平日是一個不修邊幅的人，但出活動之前，就會好姿整，襯到靚一靚至見人。

口述：戴妮廷

筆錄：龔凱欣

攝影：吳文聰

化妝：Egg Ho（ball entertainment）

髮型：Adam Wong