鄧萃雯中女蜜運 男友叫才神

鄧萃雯、馬賽、汪明荃、官恩娜（Ella）、張敬軒及鄭嘉穎等人前晚出席《屈臣氏健康美麗大賞2012》活動，向來cool爆的雯女突變「鄧四萬」，對住鏡頭笑騎騎。

物色經理人

問到是否蜜運中？雯女笑不攏嘴說：「你哋話係咪係囉。（揀緊？）開心。（老外定本地人？）我只答你開心。」記者叫她效法鄺美雲大方公開有「樓神」之稱男朋友，雯女說：「咁我要識『戲神』同『才神』。」

雯女透露正物色新經理人，她說：「唔係睇錢，搵經理人好似搵老公咁，要了解、欣賞對方，用時間磨合同付出感情，唔好當我搖錢樹。」隨即冧笑說：「男朋友用嚟撒嬌，經理人用嚟詐型。」

官恩娜大露背上陣，性感冠全場。	軒仔以「煲呔張」形象出席頒獎禮。	馬賽揚言沒打過Botox。

以代言人身份現身的馬賽坦言喜愛中醫美容，還表示因剛旅行返港，故沒留意有市民打醫學美容針致死新聞，更揚言沒打過Botox。

提舊愛尷尬

穿上露背連身裙的官恩娜對於有傳她與舊愛吳卓羲翻撻，她否認說：「好耐冇聯絡。」問到是否已取消對方電話？Ella表現尷尬，只說：「啱啱簽咗新公司，工作為先。（冇機會翻撻？）可能咁啱我有劇集出當宣傳啦。」

雖然Ella是「四大」歌手，但她透露今日將出席劇集宣傳，她說：「之前台慶都有叫我，只係我病咗，要男朋友送藥過嚟。」

採訪：音樂組