趙式芝一句「My Wife」氹Sean笑番
趙式芝（Gigi）自與波爾錶太子女楊如芯（Sean）公開婚訊後，一直被父親趙世曾否認兼以5億招婿，趙世曾與Sean之間一直存在分歧，為表對Sean真心，趙式芝正式表態，昨在facebook發表愛的宣言「call her my wife」以「妻子」稱呼Sean，揚言要轟轟烈烈了結事件，為博「紅顏」一笑。
上月中，趙式芝公開與Sean的婚訊後，一直遭父親趙世曾拒絕承認關係，並用5億來招婿，事件不只被國際傳媒報道，更獲美國電影公司睇中，有意將故事改編為電影。
成為傳媒追訪對象的趙式芝，昨日終於在facebook表態，並向Sean留下愛的宣言：「生命中有個特別的人，她是吹動我船帆的風，你可以叫她做我的妻子。」她暗示Sean是她的「妻子」，又指當她歡笑時生命充滿色彩，大讚Sean是溫柔、可愛又直接的人，與複雜與充滿計算的香港人完全相反，現希望她可以重拾笑容，暗指Sean為最近的新聞而情緒低落。
在紛爭中長大
記者致電趙式芝，問到Sean的情緒是否受到困擾而留言給對方一個肯定？她說：「Sean同我父母間有矛盾，佢哋講唔識Sean，唔鍾意佢，件事搞到沒完沒了，我希望嚟個轟轟烈烈了斷！唔想件事再糾纏落去，想正面面對，見Sean唔開心，想以此支持佢。（My Wife是否指Sean？）如今唔使開名都知係邊個，唔怕講呢件事。」
夾在爹哋與「老婆」之間的趙式芝，希望兩方面都可以好好溝通，她說：「呢啲事唔係只發生喺我身上，好多父母都唔鍾意自己子女嘅另一半，唔好理佢乜性別，呢啲好普遍，唔係得我一個人發生呢啲事。」她又言父母怪責Sean公開婚訊，令Sean更受到傷害，目前只能等時間過：「依家冇直接方法可以解決，希望利用時間及溝通解決，但兩方面都唔想溝通，我只可盡我嘅責任，同我父母溝通，又同Sean溝通。（做夾心人係折磨？）我由細到大都喺紛爭中長大，我慣咗面對呢種事情，但Sean喺溫馨和諧中長大，佢屋企人好支持，所以遇到件事會傷害到佢，令佢好唔開心，我依家最擔心Sean嘅健康，因為情緒會影響健康。」
另一邊廂，Sean在電話中不願多談，她說：「我冇唔開心，冇嘢回應。（趙式芝話轟轟烈烈了斷事件？）咁我都轟轟烈烈多謝佢。」
文：名人組