廿四孝媽咪娜奧美屈絲（Naomi Watts）剛從西班牙返曼哈頓便緊接出動湊仔，幸得男友利夫舒拉比（Liev Schreiber）充當「車夫」兼「人肉鞦韆」氹掂「甩繩馬騮」，認真唔話得！
《金剛》（King Kong）英國女星娜奧美周一晚才現身西班牙出席新片《海嘯奇蹟》（The Impossible）舉行的首映禮，翌日便已飛抵紐約曼哈頓「開工」當廿四孝媽咪，耐力驚人！未被時差影響精神的娜奧美繼周二接囝囝放學後，前日連氣都未抖順立即再度與利夫出動，兩人打扮隨意踩單車。
二人接大仔Alexander放學前先帶細仔Samuel到公園玩，十足「甩繩馬騮」的他於公園周圍跑，又黐實利夫兼拗腰扭計要抱抱，利夫更充當「人肉鞦韆」，用一雙「麒麟臂」捉實Samuel雙手並將其揪起前後fing，氹到Samuel哈哈大笑，再捉住Samuel雙腿玩「倒豎葱」。
走到遊樂場時，利夫再度當「陪玩」，將Samuel雙腳鈎在小橋的橫欄間，施展「倒掛金鈎」，娜奧美在旁笑得十分開心。期間三人到麵包店醫肚時，被條蕉塞滿成個嘴的Samuel表情十分搞笑，最後再接大仔Alexander放學，利夫充當「車夫」齊返家。
另外，名模Heidi Klum周二亦充當廿四孝媽咪，帶同仔女一同到加州迪士尼公園慶祝囡囡Lou的3歲生日。當日Heidi與保鏢男友Martin以黑色打扮示人，猶如情侶裝，而「壽星女」Lou則穿公主裙，打扮可愛。除Heidi全程當「跟得媽咪」，陪仔女玩旋轉木馬及旋轉車胎外，Martin亦十分盡責，落場陪Henry及Leni玩過山車，十足一家人。
文：外娛組