左麟右李派歌迷做臥底

校長和克勤在樂壇攜手合作多年，「左麟右李」深入民心，現更殺入飲食界，誓將香港飲食文化發揚光大！貴人事忙的校長坦言不論工作多忙，有機會一定抽時間落場打點，校長更笑言為確保服務質素，會派歌迷做臥底：「員工淨係對我哋服務好係無用，一定要客人覺得啲嘢好食、服務態度好先得！所以歌迷就係我哋啲臥底！」

克勤補充：「歌迷最適合做臥底，因為佢哋生面口，又夠仔細，兼且會向我哋匯報！佢哋密密嚟食仲可以喺經濟上支持我哋，哈哈！」

講錢不失感情

校長與克勤老友鬼鬼，坦言不怕講錢失感情，校長表示：「我哋係一個體系，我負責同股東爭取利益，當我爭取到利益，克勤仲會得益！」對於會否進軍內地飲食業，克勤坦言：「當然想，但要一步一步嚟！想做好香港市場嘅口碑先！我哋希望做到快靚正，適合街坊口味，價錢又大眾化！」克勤與校長雖然主意多多，但他們揚言現時只會集中精神做好飲食業，克勤更笑言不會涉足皮鞋業：「唔想賣鞋，因為唔想成日被人踩住，哈哈！」校長更抵死回應：「仲有一定唔賣廁紙，唔使講大家都知點解啦！」

文：李佩珊

攝：倪立煌

場地：左麟右李粥麵小菜專門店