陳倩揚黐實囝囝 老公眼冤
自去年六月誕下愛子陳羲廷，陳倩揚（Skye）工作依然無間斷，不過她仍分配大量時間陪囝囝，日前更一家三口到海洋公園提早過萬聖節。Skye與「小情人」囝囝全程黐到實，二人關係Sweet過夫妻，難怪被冷落的爸爸即大變醋埕！
靚媽陳倩揚（Skye）上周日攜同老公陳浩然及16個月大的囝囝陳羲廷（Auryn）到海洋公園共享一天家庭樂！適逢萬聖節，兩公婆亦不忘為愛子穿上南瓜圖案披肩，迎合園內「哈囉喂」氣氛。甫抵達一家三口便急不及待往「南瓜城」大玩特玩，爸爸陳浩然更充當攝影師為Auryn留倩影。
會做開明奶奶
欣賞台上小丑表演時，Skye手抱正牙牙學語的Auryn眼睩睩四圍望，似乎未搞清現場狀況，非常趣致！期間，見Auryn不時嗲媽咪抱，全程儼如樹熊般黐到實，Skye也不禁冧爆道：「佢好鍾意我！一返屋企就黐實我又攬又錫，重Sweet過同爹哋拍拖，但爹哋就好眼冤！不過到佢十幾歲識咗女友就唔會咁黐我，但如果由細到大關係好，到時應該唔會唔理我，相信將來我都會係個開明奶奶。」而身旁的老公聞言即呷醋高呼：「快啲生番個女！」場面惹笑！Skye坦言待兒子兩歲懂性後再計劃追女，目前則專注照顧他及努力賺錢。
瞓少啲陪囝囝
談到為兒子報讀學校，Skye表示國際及本地學校也有報名，讓囝囝吸取多點經驗，並謂着重家庭教育：「佢仲細需要時間觀察，做父母要知自己小朋友性格，畀適合嘅嘢佢，唔好聽邊間出名就盲目去報，最緊要唔好畀壓力，等佢開心去讀書就會事半功倍，家教同修養都好重要。」面對繁忙工作還能兼顧家庭與事業的Skye亦感到自豪，並謂寧願捨棄睡眠時間，也要分配多點時間陪囝囝。
文：影視組