陳僖儀「撞鬼」喪喊失威
孖妹組合AOA、鄒文正（Terry）、陳僖儀（Sita）相約歡度萬聖節，他們分別玩鬼屋時，出現了漸進式的連鎖反應，AOA笑住玩零難度，Terry扮鎮定不失霸氣，Sita「撞鬼」後竟嚇得蹲地喪喊。
歌手陳僖儀（Sita）、鄒文正（Terry）、孖妹組合AOA及Rapper Master Mic日前聯同電台DJ斌仔、阿O以及Morle到海洋公園一同玩盡萬聖節，他們分成三組進入鬼屋！
鄒文正愛鬼畫符
本以為AOA和阿O身先士卒會驚餐飽，誰知道孖妹竟然與一眾「嘩鬼」打成一片，遇上科學怪人時，AOA還扮鬼嚇番轉頭，認真搞笑！問AOA為何完全不怕鬼？她們笑說：「平時好鍾意睇恐怖片，因為覺得好刺激，下次我哋要扮貞子入鬼屋，嚇番佢哋轉頭！」
之後，Terry與Master Mic及Morle以一個「嬲」字的組合進入第二間鬼屋，而身為AOA師兄的Terry反而不像師妹般從容不迫，面對妖魔鬼怪更不時面露擔心神色，但畢竟Terry乃堂堂男子漢，面對一眾「嘩鬼」也要按捺自己不要大叫，他說：「因為我未玩過鬼屋，所以我好驚。最恐怖係唔知佢哋喺邊個位置出嚟，所以成日都要估估吓！」Terry又透露喜歡中式鬼多於西式鬼：「以前我都幾鍾意睇殭屍片，好鍾意用紙去扮鬼畫符。」
嚇到突然爆英文
而Sita和斌仔則迎接最後一戰，Sita臨進入鬼屋前都「笑晒口」大擺甫士，惟進入場內就被棺材旁的「厲鬼」嚇至面容扭曲，其後離開場景有另一「猛鬼」衝近，嚇得Sita即時大叫：「Get away from me！」她更激動得蹲地挨住喪喊，同場的斌仔不時安撫她的情緒，更陪她提早離場。
文：專案組
場地：海洋公園