溫碧霞怒摑Deep 全身顫抖

溫碧霞（Irene）為拍英皇電影《紮職》可謂豁出去！除只穿內衣拍攝外，更罕有地當起狠心阿頭，在拍攝其中一場掌摑下屬吳浩康（Deep）的戲份時，更放下斯文包袱，出盡全力掌摑Deep，令對方面上慘留鮮紅五指印，果然Irene發火，非同小可！

據工作人員透露，Irene原本因怕打傷Deep而「手下留情」，但因頻頻NG，為求逼真才狠下心腸出盡全力怒摑Deep！事後Irene直言對Deep感到歉疚：「我驚如果啲力未夠盡嘅話，個效果唔好要再嚟，Deep會白痛一場。與其係咁，不如我狠心啲摑落去仲好！結果個巴掌大聲到嚇窒晒所有工作人員！事後大家都異口同聲話唔敢得罪我，怕畀我打死。」

臉皮厚 可多捱幾巴

至於Deep事後笑指自己「臉皮厚」，故不怕捱多幾巴！他說：「只要出來效果理想就得。反而我見到Irene姐摑完我之後，成個人不自覺咁抽搐，仲要不停透大氣，眼泛淚光。比起我塊臉，我更加擔心佢嘅反應。」