妙芝請纓 幫周汶錡湊仔

名模周汶錡(Kathy)剛於法國舉行婚禮,有份出席的好姊妹如黃佩霞及歐陽妙芝等盡興而回,更踢爆新娘子急於造人,還向她們索取產後修身意見,而她們亦催促Kathy早日當媽媽!

昨日法國護膚品牌EviDenS de Beaute香港首間美容水療中心Le Spa EviDenS於銅鑼灣隆重開幕,大會請來名模馬詩慧、歐陽妙芝及姚書軼等出席,還有楊諾思與楊黛思姊妹、余安安等嘉賓。其中於Kathy婚禮擔任姊妹的黃佩霞就表示剛回港,並透露婚禮很感人,她說:「我哋成堆姊妹嫁剩唔多,加上嗰度地方又好靚,Kathy斟茶畀媽咪時兩母女都眼濕濕,我自己都忍唔住想喊,諗番起自己結婚斟茶嘅時刻,好感動!(Kathy同老公幾時返?)應該下星期返,因為開季好多嘢做,依家要返嚟還工作債,(香港擺酒?)未決定,都係傳聞!」

問到Kathy是否趕生B?她踢爆貪靚的Kathy:「佢都有問我哋好多關於修身嘅意見,我哋就不停轟炸佢快啲生!」在旁同樣有份參加婚禮的Kathy好友侯維德亦說:「佢老公話佢戴咗六隻金豬牌,要幫佢生六個BB!」

開心撇老公外遊

而妙芝就踢爆Kathy想生B卻不想湊B:「佢依家有計劃,但佢話生完唔會自己湊,我就話等我湊!」她又表示自己首次撇下老公「外遊」,感覺自由自在,她續說:「今次好開心,好享受單身女子生活,因為(婚後)從來未試過,好興奮好high,飲酒都冇咁high,(唔掛住囝囝?)可能有時差,佢哋瞓覺時我就放心自由自在玩,平時唔慣夜生活,佢喺嗰邊凌晨都唔願瞓!」

文:名人組