波叔演趙世曾「叻」到荷里活

趙世曾出價招婿要將女兒由攣變直，成為國際新聞，同時亦成為電影公司拍攝的新題材，來自荷里活的派拉蒙電影公司前日宣布要將事件改編成電影，取名為《The Lesbian》（女同性戀者），由演哈薩克記者「波叔」的英國諧星沙查巴朗高漢（Sacha Baron Cohen）任監製，「波叔」更大有機會參與演出趙世曾的角色，或飾演一個接近其女兒以取得獎金的男人，但電影只是開始籌劃，未決定編劇人選。

揀辛康納利做老竇

記者致電Gigi，問到她與Sean的故事，大有機會被拍成電影，由「波叔」做監製，Gigi說：「我有睇過佢嘅戲，都OK，但Sean頂唔順，佢唔識笑，覺得佢核突。依家都有人搵過我哋，就算開嘅故事唔一定係真實，真實一定好睇過拍出嚟。同埋好難搵到個老得嚟好似我爹哋咁靚仔嘅人。（你覺得邊個飾演爹哋角色最適合？）好難搵，最適合應該係辛康納利（Sean Connery），不過佢老咗啲。」Gigi被再三追問誰演她最為恰當，她笑言《魔盜王》系列女星姬娜萊莉（Keira Nightley）做她的角色，而Sean則由《黑天鵝》女主角妮妲莉寶文（Natalie Portman）擔任。問她點解，她說：「唔知，憑感覺，覺得佢哋有性格。（唔介意佢哋開拍？）冇得想唔想，人哋搵條橋出嚟。」

Gigi又表示一直希望事件盡快平息，因公開婚訊後，令她十分困擾，她說：「依家成日瞓唔着及喊，唔想爹哋媽咪咁辛苦，但又唔可以唔為人權出聲，覺得點解男女咁唔平等。」Gigi又謂facebook已收超過23,000人想與她做朋友，每日都有不少電郵，令她十分困擾，已交專人處理，她說：「我盡量唔會去睇，避免影響心情及工作。」

唔驚諷刺樂於畀料

至於趙世曾在電話中透露沒有電影公司與他聯絡，他說：「如果電影公司有興趣可聯絡我，我唔介意畀正確資料佢。（驚唔驚佢哋諷刺你？）當然拍戲需要誇張啲，我知美國有不少報章報道有關嘅事。（收番五億言論？）唔會，我都收到幾千個應徵者。（如果搵你客串，你是否願意？）都未係事實，我不作評論，都要有劇本先。（會否投資？）暫時唔知，傳佢哋搵二億美金拍，可能佢哋只係講。」

文：名人組