田蕊妮唔生B：費事子女一身債

由細到大都好想生仔，覺得係女人必經歷程，尤其三十歲時好想生，近呢幾年直情冇生仔念頭。因為近幾年我同阿澤相處都好舒服好開心，如果話因為生仔令我哋更加開心，我覺得唔需要。

舊年媽咪有胃癌，我有諗過生個孫令佢開心啲，媽咪都話我有仔女嘅話，老來有個照顧。但我諗深一層，怕對小朋友唔公平。我照顧媽咪時，不但盡咗做仔女嘅責任，但同時又面對緊親人嘅死亡，我唔想畀仔女負擔，唔想因為咁而生小朋友，咁樣會好自私，會畀好多責任佢。同埋唔可以寫包單我老咗，會由仔女照顧我，分分鐘可能我要照顧番佢轉頭！

做足保險 唔怕造人

有次同媽咪傾開生仔問題，我同佢講，我依家真係好開心，又有能力照顧自己。我唔知自己幾時死，可能我死得早過媽咪你呢，係咪先？凡事冇寫包單，生老病死真係唔到我哋控制，既然我咁享受現狀，不如享受每一日！我嚟呢個世界都係自己一個o架啦！

奶奶都冇問題冇壓力畀我，因為佢已經有孫。其實，講生仔，阿澤仲唔想過我，呢幾年比我更加唔想生！當然我媽咪有事時，有同阿澤傾過生仔，阿澤仲話：「咪當送件禮物畀你囉，我都冇咩嘢送過畀你！」但係佢不嬲冇乜特別話想生定唔生。我知阿澤一定係好爸爸，尤其見佢同姪仔或契仔相處時好有耐性，玩得又開心，但算啦！我哋都打消生仔呢個念頭！唔會有意外啩！我哋保險工夫好足，同埋佢拍戲長期有避孕套贊助，哈哈！

講番媽咪，佢有日打嚟話有胃癌時，我估唔到自己咁冷靜，反而哥哥仲驚過我。媽咪要切咗個胃，食嘢要好似雀仔咁食少少，但佢向來為食，唔可以食得多而唔開心。有次媽咪話覺得個喉嚨好似畀個鎖鎖住咁吞唔到嘢。我當時揸緊車開工聽到佢咁講，真係忍唔住爆喊！媽咪呢個病，令我更珍惜每一日，所以我會成日拖吓攬吓佢，細個時會唔夠膽，依家每一日都攬住父母錫，氹下佢哋開心。

口述：田蕊妮

筆錄：專案組