陳豪錯失Aimee拖羅蘭行禮
藝人陳豪（阿Mo）、陳茵媺（Aimee）、羅蘭、黃德斌、高海寧等一班《天梯》演員昨日在黃大仙與一眾街坊一齊歡度中秋節，眾藝員大玩「行禮」及牽紅線遊戲。原先大家睇好陳豪會抽中Aimee，結果陳豪先被安排跟羅蘭拿着紅花球拖手行禮，後再抽中綁着羅蘭姐手上的紅線，十分有緣。對此，羅蘭亦大呼好冧，更用飛吻及錫面回饋陳豪：「我真係好鍾意佢o架，佢喺劇入面真係好幫得我手。」
蕭正楠嫌「老婆」重
輪到蕭正楠抽時，他口花花地表示想抽中高海寧：「我想過一個快樂嘅中秋。」不過最後他抽到陳茵媺，他即搞笑地說：「抽到Aimee當然快樂啦，但係有阿Mo喺度就冇咁快樂。」之後，蕭正楠又抽中要背負在劇中飾演其老婆的何綺雲玩遊戲，但他抵死嗌重。陳豪和陳茵媺雖然經常情侶檔出席活動，不過叫二人合照均表現尷尬，陳茵媺還硬拉黃德斌一起合照，變成「三人行」，令德斌尷尬得想逃走。
Aimee事後解釋：「因為我喺套劇入面係同德斌一對，所以先拉埋佢一齊影相。（阿Mo抽唔中你條紅線失望？）玩遊戲啫，我都想揀羅蘭姐，佢好型。」至於陳豪則尷尬表示：「依家唔係玩遊戲，係玩我哋呀，不過好彩揀咗羅蘭姐，唔係就大件事。（怕Aimee呷醋？）唔係，玩下啫，當宣傳。」
談到昨日是中秋節，Aimee好開心能夠和阿Mo一起在工作中度過，再問到二人會否在稍後夜晚見面時，Aimee搞笑做封嘴手勢：「唔話你知！」
文：影視組