老公細心溝女最叻

好奇怪,阿澤真係冇表達過會擔心我會有狂蜂浪蝶。如果我同其他人拍親熱戲,問佢個心有冇乸住,會畀佢話黐線!好似着衫咁,阿澤會話:「你咁後生,有身材應該畀人睇吓啦!」又或者話:「你以前着衫好大膽,結婚之後都可以o架!」

其實阿澤溝女好叻,細心過我,仲好鍾意搞驚喜浪漫。如果我喺屋企,佢一定會早過我起身,親自煮早餐畀我食,仲要煮完拎上床,名副其實係breakfast bed,好似拍荷里活片咁。

平時大家都會臨瞓睇書,阿澤睇好多,但我又好懶睇,所以會問:「老公!今日講咩bedside story我聽。」有時大家傾開偈會隨時傾天光。今年結婚七周年,連埋拍拖大家一齊十三年,阿澤畀驚喜我,整咗成枱餸畀我食。呢啲小情小趣,買幾多名牌都冇用。經歷咁多嘢之後,佢係一百分老公。下一世,問我想唔想同阿澤做番夫妻?我會覺得大家會結合咗,做同一個人!