其實阿澤溝女好叻，細心過我，仲好鍾意搞驚喜浪漫。如果我喺屋企，佢一定會早過我起身，親自煮早餐畀我食，仲要煮完拎上床，名副其實係breakfast bed，好似拍荷里活片咁。
平時大家都會臨瞓睇書，阿澤睇好多，但我又好懶睇，所以會問：「老公！今日講咩bedside story我聽。」有時大家傾開偈會隨時傾天光。今年結婚七周年，連埋拍拖大家一齊十三年，阿澤畀驚喜我，整咗成枱餸畀我食。呢啲小情小趣，買幾多名牌都冇用。經歷咁多嘢之後，佢係一百分老公。下一世，問我想唔想同阿澤做番夫妻？我會覺得大家會結合咗，做同一個人！