田蕊妮有錢冇幸福：我想離婚！
夫妻本是同林鳥。今年結婚七周年的田蕊妮，承認曾想離開杜汶澤，但非因大難臨頭，又或發現有小三才各自飛。而是當身邊男人名成利就後，兩人的幸福距離竟漸行漸遠。一連五日，田蕊妮在本報盡訴女人心經，包括工作、婚姻等點滴。
哈哈！我真係好崇拜好愛杜汶澤o架！今年結婚七周年，佢仲親自下廚整咗個大餐我食，呢啲生活上嘅小情小趣，已經令我好感恩，我亦唔會再記住當年畀我發現有第三者呢件事！首先澄清，我向來都唔會check佢電話，只係女人直覺，嗰輪感覺上係距離我好遠。
直至有次同成班人食飯，突然間有人SMS佢，佢咁啱去咗廁所冇拎電話，我只係習慣，冇心之下幫佢望一望，就見到有個親暱短訊。短訊內容係咩唔想講，但當然唔會開心啦！當阿澤返埋位，我只係講：「有SMS搵你喎！」佢望一望部電話，即刻知自己賴咗嘢啦！食完飯一上車，大家當然會嘈起上嚟，最後佢有氹番我。
「做乜嘢都驚會影響佢」
我係好善忘，我最後決定咗唔走，就唔會拎番呢單嘢出嚟繼續鬧佢。我愛佢當然因為佢charm，任何一個人都會有異性喺身邊出現，以前我會認為係啲女人衰，但依家覺得係睇佢有冇定力。如果佢選擇去做就要承擔後果，咁就OK，Let Go！我相信佢識得諗，同埋冇得擔心。好多嘢未發生，冇得擔心咁多，依家呢一刻開心就夠。
反而我最想離婚嘅時候，唔係因為有小三，而係有段時間，真係同佢溝通唔到，有錢時真係唔快樂！但如果之後唔係有低潮，我諗我哋已經離咗婚。當年佢好成功時，個個都走嚟話：「阿田，叫你老公改吓！唔好咩都講到咁大！」我知大家係為阿澤好，但任何人點講都好，只有佢自己想改先會改。我最唔開心，係大家之間基本溝通都好迷失！身為太太我應該做啲咩去配合佢？咁講怕唔怕令佢唔好？點着衫先唔會影響佢呢？我真係好驚！做乜嘢都驚影響佢！
同佢傾偈，又完全傾唔到，我話佢知有咩唔開心，佢又好似聽唔入耳咁！兩夫妻好似陌生人，個感覺好迷失、好疏離。當時我真係想走！有日坐喺廳，喺度諗：「如果今日有人話我同佢嘅緣分到此為止，咁就好嘞！」我試過搬去酒店或去朋友屋企暫住，但絕對唔敢返娘家。因為父母初時都反對我同佢一齊，我唔想屋企人知，怕難修補。不過我好小女人，過兩日又返去。
「呢個時候離開佢好慘」
直至有唔少負面報道湧埋阿澤到，我開始諗，我係佢唯一信任嘅人，如果呢個時候離開佢，佢會好慘，所以選擇留低陪佢一齊面對。最初戥佢唔抵，叫佢出嚟澄清，包括傳佢話吳君如生仔冇屎忽，又傳佢又有賭債。我好肯定阿澤唔會咁講，同我一齊冇賭過。但阿澤話唔澄清，佢好有智慧咁話：「咁樣寫我，大家都係打份工啫！信咪買囉！一定係人哋覺得我係有問題先至咁寫！」
「買風水物品闢是非」
阿澤有好多負面新聞，當時我唔知點幫佢，我係小女人，惟有走去拜神或買風水物品幫佢闢是非，逐漸接觸到寧波車。接觸多咗，聽多咗簡單做人處事道理，原來好多簡單嘅道理係遺忘咗。2008年年尾我真正皈依，初時學打坐，一坐低唔夠五秒，就會起番身，諗好多無謂嘢。人原來諗太多，未試過心閒。依家我同阿澤有共同信仰，令我哋相處更平和。
文：專案組
攝：劉智源
服裝：Zadig & Voltaire
場地：L'hotel Island South