洪卓立爆泳兒醉癲一刻

泳兒(Vincy)、洪卓立(Ken)兩個慢熱「啞巴」因按摩而揼出友情,其後曾發展成緋聞情侶;在Ken眼中,cool爆的Vincy堪稱「神奇女俠」,皆因只要「幾杯落肚」,好友即變「high爬(hyper)girl」,激得Vincy急澄清非酒鬼一名!

難忘首次合作

泳:Ken,你記唔記得我哋第一次見面係幾時呀?

Ken:5年前嘛,嗰時我仲係新人,第一次拍廣告,我哋咪一齊喺紅磡火車站度拍電話儲值卡廣告囉,仲係扮情侶添。

泳:嗰時我都好新,都係早你1年入公司,我哋可謂新鬥新,咁我個人又慢熱,唔會太主動講嘢,所以嗰時大家都冇傾偈,我只係記得因為我早過你入行,都算係你師姐,所以我都好主動同你傾幾句,好似問你幾多歲之類。

Ken:呢樣我就唔係好記得喇,只記得嗰日好早通告,拍到中段已經好眼瞓,大家就一齊坐喺火車站啲櫈度瞓覺。

泳:咁,我哋點樣開始混熟?

Ken:我記得係大家一齊做嘢,兩個job中間有段空檔時間,大家就話不如一齊去揼骨啦,去到按摩度,我仲坐喺你隔籬。

泳:係呀、係呀!我記得啦,喺香港按腳嘛,仲係我提議去添,我係骨精,好鍾意做按摩。

粉絲信魚蛋「情緣」

Ken:你記唔記得我哋仲傳過緋聞呀?

泳:唔記得,邊有呀?

Ken:有呀,有次我同你一齊去睇貓展,之後去拮魚蛋,點知畀人影咗相,就傳我同你有嘢啦。

泳:邊有人會信o架?

Ken:有呀,我啲Fans真係信喎。

泳:吓?咁你啲Fans咪真係好憎我囉,哈哈哈。

酒後講個不停

Ken:仲有樣嘢,我唔知講唔講得,其實你好飲(酒)得囉。

泳:唓!我都唔知咩叫飲得。

Ken:你好鍾意飲酒,同埋你飲完酒,大家都覺得你好好玩,好好睇囉!

泳:哈哈,唔知點解有啲人飲完酒就會變成另外一個人,我飲完會好high,同埋好多嘢講,我試過打畀髮型師,但其實係冇意思,只係飲醉咗。

Ken:你真係好high爬(hyper),你會係咁不停打電話同人講嘢,真係好好笑,當你不停咁講嘢嗰陣時,就知你醉咗。

泳:但大家醉嘅定義都唔同,我知我做緊咩o架喎,我記得晒o架。

Ken:唔……都冇乜嘢嘅,不過你好似癲咗咁,周圍同人講嘢之嘛。

泳:我平時好少搵人玩嘛,我係去party先飲,唔好講到我好似酒鬼咁啦,我唔知咩叫飲得,其實我只係敢飲,啤酒、紅酒,乜都敢飲,係你哋唔飲得之嘛。

Ken:係呀,我係去飲汽水,唔畀o架咩?

泳:Sherman(鍾舒漫)飲醉就會瞓覺,我就周圍同人玩,所以你哋好鍾意睇我飲醉。

另類癖好愛睡車內

Ken:我哋都試過圍攻你幾次,屈你飲酒,但每次都唔成功,你好醒,次次都話第二日要開工,唔上當囉。

泳:我係自己想飲就飲嘅人,好似我生日party,我好開心又想同大家一齊玩就會飲啲。我試過有次醉咗,就拉住人唔畀人走;又有次開萬聖節party,我屋企個貓頭裝飾冧咗,就打電話畀髮型師叫佢嚟幫我執一執,但佢唔理我囉,話瞓醒先算喎,我咪自己整番個頭囉。

Ken:仲有樣嘢,你好得意嘅,就係好鍾意喺車度瞓覺囉。

泳:係呀,可能我好鍾意多人陪住我,覺得咁樣先有安全感,所以坐長途車時,我瞓得特別冧,反而我喺屋企張床就瞓得唔係咁好,有時捱到天光先瞓到。

採訪:音樂組

攝影:沈健程

服裝:Marijuana

化妝:Cyrus Lee@Beauty Tech

髮型:Keith Wong@orient4.com.hk

場地:紅磡都會海逸酒店