諸葛叫得親切：主席哥
榮升馬主的郭富城，其新馬「愛的呼喚」一擊即中贏頭馬，令一眾明星藝人都為此瘋狂，個個夢想將來成為馬主，更諗定愛駒名字。苟芸慧希望給愛駒改名「苟９」，實行要跟她姓。而另一女神岑麗香就想有一隻「巴不得馬馬」，以紀念令她成名的《巴不得媽媽》劇集。至於諸葛紫岐則會幫隻馬改名「主席哥」，好似叫緊其「主席」老公薛嘉麟個名咁夠晒親切。
《iBLUES活動》諸葛紫岐
「我會改佢做『主席哥』，因為我老公薛嘉麟（主席）生肖屬馬，所以講起馬我就會諗起佢。比賽嗰陣，我仲可以叫『主席哥快啲！快啲！』都幾得意。」
《手袋活動》雨僑
「我會叫『唔係阿馬』，如果贏咗宣布冠軍時，就得啖笑，開心就得，而且好易記，我仲諗埋英文名，『you are not a horse』。」
《護膚品牌午宴》陳君宜
「叫『宙斯』，是勝利之神嘅意思，好意頭，同我公司名一樣。」
《LONGINES活動》昆凌
「我會叫牠『Dream Out Loud』，因為喺我10歲時，第一次跟家人去睇賽馬，嗰時我選了一隻這個名字嘅馬，最後佢贏咗，所以呢個名字令我印象深刻。」
《新太陽廣場活動》何傲兒
「叫『傲氣長存』，一來同我個名一樣有『傲』字。另外，跑馬最緊要有氣有力，如果隻馬夠長氣，咁就一定會贏啦！」
貝安琪
「我會叫佢做『Star No. 7』，因為7係我嘅幸運數字，而星星都代表幸運。賽馬最緊要好彩頭及好意頭，所以我幫隻馬改呢個名。」
《Ted Baker2012秋冬發布會》岑麗香
「我會用『巴不得馬馬』呢個名，因為《巴不得媽媽》為我帶來好難忘嘅回憶，仲係第一次孭重戲嘅劇集。」
苟芸慧
「想叫『苟9』，苟係我個姓，而9代表長長久久，我知道有啲唔能夠出賽嘅馬，會被人道毀滅，好慘！所以希望佢哋生命長長久久。」
《時裝活動》湯洛雯
「我會叫『雯雯寶貝』，因為大家都叫我雯雯，當然叫番自己名，好可愛，可愛到贏硬。」