姚煒：搞到我哋關係唔好
趙式芝與楊如芯驚爆同性婚姻之後，不為父親趙世曾承認，母親姚煒亦直認傷透了心，及後趙世曾重金招婿，外國傳媒爭相報道，成為轟動國際的新聞。昨日記者以電話聯絡上姚煒，問她對「轟動國際」有何意見？她即忟憎地回應：「唔回應啦，你哋有咩就講啦，我唔會再回應o架啦！我講嘅嘢，傳媒都斷章取義，搞到我哋關係唔好。」
另外，當選議員後大方承認是同性戀者的陳志全（慢必），對於趙世曾出聲明否定愛女的同性婚姻，慢必說：「體諒趙生面對囡囡come out，身為父母係要一段時間適應，加上趙生係社會上有影響力嘅人，佢幫囡囡否認係一個鴕鳥政策。」會否覺得趙生歧視同性戀？慢必說：「當然一定有，但可能佢對外人唔係咁呢？只係唔能夠接受仔女，講到同性結婚就晴天霹靂。（會唔會聲討趙生？）唔會，真係體諒佢，不過會觀察佢發放嘅言論，佢都係少講為妙。」