「萬人迷」碧咸（David Beckham）一向疼愛子女，上周末於洛杉磯更抱着愛女夏柏舒芬（Harper Seven）睇三個兒子踢波，不時輕吻女兒晒幸福。
碧咸與老婆Victoria一向愛錫仔女，早前Victoria於紐約時裝周開騷，碧咸帶同十四個月大的夏柏舒芬驚喜現身，令一向冷酷的Victoria笑逐顏開！上周末碧咸又抱着夏柏舒芬於洛杉磯出巡，不過今次並非睇騷，而是看三位兄長練波！以小背心襯牛仔褲現身的夏柏舒芬，被讚跟Victoria一樣打扮入時。碧咸於場上抱着夏柏舒芬，不時跟夏柏舒芬分析踢法，不過夏柏舒芬好像不想聽阿爸講波，寧願自己行逛！
知道女兒不想聽波經的碧咸，立即抱起夏柏舒芬扮火箭升空，夏柏舒芬即時笑開懷，更玩碧咸頭上的棒球帽！見愛女玩得如此開心，碧咸即時錫愛女面珠，盡顯父愛！而早前有傳碧咸於下月中會和Victoria再訂婚盟，同時為大仔布魯克林（Brooklyn）及二仔羅密歐（Romeo）舉行浸禮，知情人士透露二人除了會重遊舉行婚禮的愛爾蘭外，亦會於洛杉磯大宅舉行派對慶祝。
文：外娛組