汪圓圓等加讚求婚送戒指
模特兒汪圓圓與「玩具大王」蔡志明之子蔡加讚拍拖年多，至今未有收過情侶戒指，她冧爆的說待男友正式求婚才可收戒指。而自爆感情無着落的吳嘉龍，聞得「舊愛」名模周汶錡將出嫁，即時「哭叫」大呼：「蝕咗嘞！」
汪圓圓與吳嘉龍（Carl）昨日到尖沙咀出席腕錶品牌TAG Heuer推出、集合賽車技術及航空高性能材料為概念的「豪雅 Racer」手機發布會。圓圓深知男友愛車，擁有名車不計其數，她投其所好有意送他這部與賽車概念有關的手機。
禁開快車管接管送
二人會否有情侶物品包括戒指？圓圓說：「有情侶衫同太陽眼鏡，但未有情侶戒指，因為戒指唔可以亂收，要結婚先可以收。（幾時才收結婚戒指？）等佢求婚先，佢都未求。我諗如果收情侶戒指係要佢好認真，表達到心意，感動到我先得！」
圓圓又大讚男友駕駛技術不錯，更甘願當她的司機：「我坐佢車時，佢會好錫我好保護我，我同佢講就算佢一個人揸車，都要當我喺佢隔籬！可能我揸得幾快，試過喺外國收過告票，佢唔放心我揸車，佢好願意做我司機，我好開心。」
Kathy結婚吳嘉龍喊
同場曾與周汶錡（Kathy）傳出緋聞的Carl，被問到會否參加「舊愛」在巴黎的婚禮，他聽後發揮搞笑本色，更作狀黐埋牆扮喊說：「嗚嗚……蝕咗嘞，追慢咗。」後他正色說：「不過佢開心就得，佢係一個好努力嘅女仔，識咗佢好耐，女人搵到錫自己嘅人好好彩。」雖然Kathy已有着落，不過Carl卻未有另一半，更自爆與之前的韓籍女友分手：「工作好忙，都冇時間拍拖，同埋我嘅目標唔係結婚生仔，係做戲同睇住屋企人。」稍後他將要飛往新加坡繼續拍劇。
文：專案組