嘉玲偉仔儲古董 Big爆屋企
劉嘉玲昨日出席國際級內地名畫家岳敏君的畫展，她透露近年與老公梁朝偉開始儲收藏品，包括字畫、雕塑及古董等，她大爆老公愈買愈大件，「Big」爆屋企冇位擺。
影后劉嘉玲、顧紀筠偕兒子陳浚霆到海港城出席內地著名畫家岳敏君的畫展，嘉玲獲岳敏君贈送限量版插圖麻雀，令她非常雀躍。
部分收藏品無價
嘉玲透露近年開始收藏藝術品，主要是字畫及雕塑。她說：「有時同藝術家傾完偈，知道背後故事更加可貴。（最貴重係邊樣？）有部分係無價，好似大寶法王送畀我嘅字畫。（自己有冇畫畫？）有時間都會畫，最鍾意油畫，因為比較多色彩又自由。」問到偉仔有否收藏品時，她指老公有儲古董及墨寶的習慣，更愈買愈大件，開始「Big」爆屋企。她笑謂：「我哋有分區域放，但愈買愈大件，開始唔夠地方擺。（搬大屋？）永遠都唔夠地方，依家樓價又咁貴。（偉仔亂放收藏品？）唔知o架！你知佢好情緒化。」
盼中日關係和諧
提到偉仔早前受訪時承認經常被她照顧，嘉玲坦言不會特別開心，因老公在家亦經常稱讚她。她說：「女仔天性有母愛，我更加係，打理到自己，仲好鍾意照顧身邊所有人。」對於好友曾志偉拒接受日本頒發勳章，而被日本人鬧小器，嘉玲表示：「希望所有人都有胸襟接受對方文化，可以從唔同角度睇，大家和諧一點，其實藝術同政治應該冇關係。」
文：影視組