趙世曾唔認婿 聲明愛女未嫁
卓能（集團）主席趙世曾女兒趙式芝（Gigi）20日晚才在公開活動上承認與波爾錶太子女楊如芯（Sean）已婚，消息震驚名人界，同時嚇親趙世曾！不肯承認女兒已婚的趙世曾在女兒自爆婚訊84小時後，昨早將行動升級，向傳媒發聲明，指Gigi未有跟任何人結婚，看來Gigi及Sean要獲父親認同，認真路遙遙！
趙式芝與楊如芯20日晚在北京甜到漏公布已婚喜訊，表示二人早於四月在法國完婚，當時Gigi已坦言趙世曾不想她多談有關話題，暗示對方不接受同性婚姻；同日趙世曾在電話中對女兒已婚一事多番指稱「無可能」。事件發生84小時後，趙世曾昨早採取進一步行動，向傳媒發聲明，指其女兒趙式芝並未與任何人結婚，昨日記者就此聲明致電趙世曾。
記：記者
趙：趙世曾
Gigi：趙式芝
Sean：楊如芯
記：點解要出聲明？
趙：有啲誤傳出咗嚟，我要糾正番。
記：有冇同趙式芝講過？
趙：同阿芝傾過，佢話冇咁嘅事，佢返咗嚟，同佢傾過佢話冇呀。尋日佢（再）同我講，或者有啲係誤傳。
記：Gigi本人會唔會再講番件事？
趙：佢話冇咁嘅事，唔使做啲乜，但唔知佢。
記：Gigi知唔知你出聲明？
趙：佢知我出聲明。
記：有冇同姚煒（Gigi母親）講？
趙：冇同佢聯絡。
記：之後你會再有咩行動？
趙：冇乜其他要求。
記：你同阿芝傾時，佢有冇唔開心？
趙：冇唔開心。
記：你有冇為Gigi宣布結婚而唔開心？
趙：我冇唔開心，唔糾正就唔開心，唔糾正唔好。自從Gigi講結婚後，太多人打電話畀我。
記：電話煩到你？
趙：今日未有，哈哈。
記：Gigi結婚件事影響到你公司？
趙：冇咁嘅事，登出嚟應該要澄清。
記：Gigi同你講番時，佢有冇唔開心？
趙：佢冇。
記：如果Gigi唔聽你話，將來會唔會唔分身家畀佢？
趙：同分身家冇關係，唔好扯咁遠。
記：你有冇預立平安紙？
趙：一定有準備，唔準備係唔負責任，不過每年都會重新更新內容一次。
記：係咪邊個仔女聽話就有得分？
趙：哈哈！內容唔可以隨便同人講。
當事人不願多談
至於當事人Gigi與Sean，對於趙世曾發聲明一事就明顯不願多談，跟當日高調晒甜蜜有天淵之別。
記：趙世曾發出聲明話你無結婚。
Gigi：知道父母困擾，唔想講太多，暫時唔回應。
Sean：畀佢哋多啲空間，唔想再講。
記：點解話你哋冇結婚？
Sean：我哋兩情相悅，想畀大家一個承諾，在神父見證下簽咗祝福紙，呢張紙喺法律上無效，但我視佢如結婚證書。
記：件事有冇影響父女關係？
Gigi：冇，我哋仲好愛大家。
記：會唔會保持原判繼續在港擺酒？
Gigi：呢方面暫時冇回應。
另外，據知情人士透露，身為上海人的趙世曾向來有頭有面，認為名譽比任何事來得重要，因此一直不能接受女兒是同性戀者，加上兩人如此高調宣布已婚，令他更覺很沒面子，故趙世曾堅決不會接受Sean，就算二人已公開關係，趙世曾依然叫Gigi多結識異性。而他自己向來奉行不婚主義，故就算兒子式浩與女友Winnie已誕下小朋友，趙世曾依然不鼓勵兒子結婚。
文：名人組