周柏豪鞋子夢飛翔
穿衣向來甚有自己一套，深信要做自己的歌手周柏豪，雖然衣着打扮曾遭網民批評，他亦從沒正式學過設計，但他的堅持終於得到回報，早前他就獲邀擔任鞋履設計師。自言從小到大睇人先睇鞋的他，憑着無限創意以及潮流觸覺，首個親自設計的鞋履系列也順利面世。邊學邊做的他除了享受創作過程，過足設計師癮，還獲益良多。
周：周柏豪
記：記者
記：第一次設計鞋？
周：係，我自己都好鍾意鞋，由細到大睇人都係睇人對鞋先。我會由對鞋去睇嗰個人畀我嘅感覺。所以我好留意人哋啲鞋，無論男仔女仔我都會睇。
記：今次設計上覺得最困難係咩？
周：我係完全唔識Design嘅，冇正式學過，都係自己平時睇書學。今次Design鞋好好玩，參與咗好多，每個鞋款都係我設計，係我嘅Idea，但係我唔識畫圖，其實唔一定要自己落手畫，全靠一班好好嘅團隊，同我一齊將我嘅設計變成實物。自己雖然鍾意鞋，不過對於鞋嘅製作過程完全唔識，經過今次真係學咗好多嘢。
記：講吓你設計呢個系列嘅Idea同特色？
周：我鍾意啲Hardcore嘅嘢，好似窩釘、金屬，所以成個系列都加入咗呢類元素，有一種型格嘅感覺。
記：會唔會送你設計嘅鞋畀人？
周：會送畀身邊啲朋友，我想見到佢哋着住我啲鞋出街。
恨有蝙蝠車
記：除咗鞋仲想設計咩？
周：我想設計車，因為自己好鍾意車，男仔都想擁有一架屬於自己獨一無二嘅車，我最渴望擁有嘅係一部好似蝙蝠車咁樣嘅車，原因係我鍾意蝙蝠俠，我想架車流線得嚟但又要好硬淨，可惜市面上好難搵到架咁嘅車，就正如我想搵個女仔係爽朗得嚟又好溫柔一樣，好難搵到，所以我想設計自己嘅Dream car。
記：車以外呢？
周：其實我想做導演，之前試過執導MV，對於導演嘅工作好有興趣，希望有機會可以做導演拍戲。我好鍾意創作，例如我有寫歌，又熱愛影相，任何有關創作嘅嘢我都有興趣。
記：有冇興趣出書？
周：都有，不過冇時間，同埋我唔會為咗趕書展走去出書。我之前都有出過相集，至於搞相展就未夠多作品，要儲多啲先。
拒甘於現狀
記：覺得自己係咪潮人？
周：永遠都唔會咁睇自己，我淨係着自己鍾意嘅嘢。我係一個怕悶嘅人，所以唔甘於現狀，想有變化，做歌手就可以多采多姿。「潮」係好深嘅嘢嚟，我覺得着衫最緊要係舒服，啱自己同啱場合。雖然我唔會理潮流興啲乜，但都會睇吓呢期有啲咩新嘢，畀自己新嘅嘗試。
記：最欣賞邊個時裝設計師？
周：Rick Owens，一直以嚟佢都係我最鍾意嘅時裝設計師。
黑色安全感
記：最鍾意點樣嘅衣着打扮？
周：鍾意黑色同埋Layering，會令我有一種安全感，我由細到大都鍾意黑麻麻嘅打扮。
記：有冇試過着錯衫？
周：細個試過，嗰時大約16、17歲，有次我同同學着埋同一件間條衫加同一條褲仲要同一對鞋，好尷尬，尷尬到出晒汗。自此我明白到着衫一定要有個人風格，唔好盲目跟隨潮流，唔好興乜着乜，搞到大家好似倒模咁，時裝可以有好多唔同變化，要知道自己鍾意乜，乜嘢打扮先至啱自己。冇人教我點襯衫，我自己做自己嘅Stylist，有時會有啲批評嘅聲音，不過我唔會理，會堅持自己嘅一套。
採訪：張嘉敏
攝影：黃叔榮
髮型：Cliff Chan@hair corner
化妝：Kris Wong
服裝：I.T