泳兒犬愛心 關懷老友記

泳兒：V 鄺美雲：C

V：我記得我喺未出道時，已經識Cally姐姐o架啦。

Cally和泳兒首次見面便唱個不停。

泳兒有意帶狗隻探訪老人。

C：嗰次係楊生（楊受成）喺卡拉OK搞咗一個function，楊生同我講話有一個新人，想要我聽吓佢唱歌，我聽完之後，覺得好好呀，把聲好靚，嗰晚我同泳兒不停咁唱K。

泳兒希望有私家K房。

Cally經常帶埋愛犬Cash探訪老人，氹得老人很開心。

V：我第一次見到Cally姐姐，即刻嘩一聲，因為覺得你好靚，個人好nice，你仲搵我一齊唱歌。

C：係呀，你乜懷舊歌都識唱，英文、國語歌都得，仲唱得好好添。

零架子一同放Sing

V：其實嗰時，我都唔知發生咩事，所以都唔會覺得好特別緊張，我只知要去一個party，入到去就見到好多名人時，我都嚇咗一跳，嗰時我係新人，根本冇人識我。我覺得你係大明星，但一啲架子都冇囉，心地又好，我當時係一個未出道嘅女仔，大家都唔知我係邊個時，你都搵我唱歌，嗰時我都未係叫做泳兒，係用番真名陳家欣，我入到行，真係要多謝你的力薦。

C：梗係唔係啦，咁你要有才華先可以做到歌手，我仲記得楊生話你未包裝，你嗰晚都好似冇乜化妝，好似個細路女咁樣。

V：Cally姐姐唱K時好開心o架。

C：因為唱K冇壓力，其實做歌手真係好辛苦o架，keep fit要keep得好犀利，以前我就話瘦底啫，依家好易肥，我仲要做珠寶生意、搞慈善同佛堂嘅嘢，真係好鬼忙，泳兒，你都幫我唱吓佛曲啦。

V：好呀，不過我覺得唱佛曲都有少少難度，因為啲歌詞好深，我又唔係咁了解佛教，唔係讀（佛經）到咁深入。

C：你跟我返佛堂多啲就得o架啦。

V：我又冇特別信宗教，但都想跟Cally姐姐去佛堂，我同你講過，我嚟緊會買一隻狗仔，好想帶隻狗仔去老人院做探訪。

C：依家都好多動物醫生，一齊去做慈善啦，除咗老人院、兒童院、醫院嗰啲都可以同狗仔去o架，好開心o架。

V：我記得上次去你屋企，我哋幾個成日撩Cash（Cally愛犬）玩，我諗Cash覺得我哋好煩囉，你屋企真係好勁，又大大隻鮑魚請我哋食。

渴望擁有私K房

C：我搬咗去沙田九肚山喇，新屋有卡拉OK房，以前嗰間屋就冇囉，只可以喺客廳度唱，但原來我舊屋個廳，隔籬係鄰居嘅睡房，我有晚唱到11點幾，就有管理員上門話有嘈聲，之後就冇得再唱，依家就唔同，我間新卡拉OK房整埋隔音，又問埋隔籬，話我卡拉OK房係佢書房，不過好少入去，鄰居又話唔怕嘈，仲話如果聽到聲會過嚟埋我屋企一齊唱喎，啲鄰居真係好好人。

V：我都好想擁有一間卡拉OK房，因為我好鍾意練歌，但有晚練歌練到晚上11、12點幾，管理員就上嚟拍門，話有人投訴我嘈，頂我唔順喇。

C：咁你可以嚟我屋企一齊唱啦，我又鍾意請客，大家食吓嘢，唱吓K好開心。

C：泳兒，我覺得你應該唱多啲國語歌囉，你都有喺台灣出碟o架？

V：我都係去台灣做宣傳，但主力放喺內地市場，公司依家都冇話分台灣定內地，不過佢哋覺得內地賺到錢，所以比較緊張內地市場多啲。

台灣hit歌回響大

C：我個人就覺得如果啲歌喺台灣hit咗，再打返嚟內地個回響就大啲，但去大陸宣傳好難囉，地方咁大，你去邊幾個地方宣傳呀？

V：都係北京、上海、成都啲大城市，去好多大大小小嘅電台、電視台，我都知內地地方咁大，做宣傳要花好多時間。我第一隻國語碟都有去過台灣做宣傳，反應都OKo架，不過準備去第二次時，我喉嚨唔舒服病到入醫院先去唔到，我嗰次住咗五日醫院。

C：我都試過類似情況，嗰次係去台灣做宣傳，我中咗一隻感冒菌，病到個人只可以坐喺度休息，啲菌搞到你耳水不平衡，成個人覺得好頭暈，但我都頂住，因為嗰時去台灣做宣傳，皮費好重，酒店、化妝、整頭髮乜都係唱片公司畀，如果我話病唔做，就會影響到好多人，所以我病住都照做，就係因為做歌手咁辛苦，所以我都係唔唱，得閒唱吓K算啦。

文：音樂組

攝：沈健程

服裝：Peppermint

化妝：Cyrus Lee@Beauty Tech

髮型：Keith Wong@orient4.com.hk

場地：紅磡都會海逸酒店