鄧麗欣燒燶髮

中秋節人月雙圓，今年是楊千嬅與丁子高及囝囝過的第一個中秋節，本來準備一家三口齊齊玩燈籠，惟丁子高要出埠公幹，中秋將不能過三人世界，成為他最難忘孤獨的中秋。而鄧麗欣、陳豪和林莉同稱最難忘小時候玩煲蠟，但樂極忘形險釀意外，鄧麗欣更把頭髮燒燶了，所以他們提醒小朋友，切勿煲蠟！

「細個會同一大班朋友喺天台煲蠟，有一次好危險，啲朋友灑水落啲蠟度，差啲燒到塊面！好彩最後只係燒燶咗啲頭髮，我嗰時好唔開心，但都唔敢同媽咪講。」

薛凱琪：「最記得四歲嗰陣，媽媽買咗隻好靚嘅兔仔紙燈籠畀我，我好開心。點知我去廁所時將佢放咗喺廳，出番嚟就燒着咗！之後媽咪罰我，以後都唔再買畀我。」

林莉：「細個時好簡單，四兄弟姊妹一齊煲蠟，將啲蠟燭燒到變形。依家諗番真係好無聊，不過可以咁開心、咁無憂無慮，真係好。」

周汶錡：「今年一定係最難忘，因為就快結婚，真正是人月兩團圓。」

李亞男：「最難忘第一次唔同屋企人過中秋，嗰時返到嚟香港，同鍾嘉欣一齊住。我哋一齊去食生蠔，齊齊扮可憐話好慘，冇人同我哋過中秋。其實仲開心，可以畀機會我哋互相認識。」

何紫綸：「每年中秋，男友都會送一個好大嘅白兔燈籠畀我。最難忘一次玩玩吓燒着咗，我好驚又好想喊，即刻搵水淋熄佢，但男友竟然喺隔籬笑我！」

陳豪：「記得細個有一年同哥哥喺樓下玩煲蠟，唔小心將啲蠟倒咗喺哥哥嘅大髀，爸爸是醫生，即時為哥哥療傷，所以冇去醫院，從此以後，唔敢再煲蠟，奉勸大家千祈唔好煲蠟。」

丁子高：「原本今年最難忘，有囝囝陪我同老婆一齊過中秋，但我要去第二度做嘢，冇得一齊過。自己最記得細個時，曾經返大陸放煙花慶祝中秋。」

Rosemary：「最難忘玩紙燈籠，我好鍾意拎住玩，但又好驚個燈籠會燒着，仲會攞入面支蠟燭嚟玩，燒蠟燭都好開心。」