關楚耀睇中700萬心水樓
男歌手關楚耀（Kelvin）今年歌影視三線齊發，荷包進帳近百萬元，向來孝順的Kelvin，日前陪媽咪到地產舖睇樓，首次做業主的Kelvin睇中逾七百萬元的樓宇，要愈住愈好，之後他還買靚海味孝敬媽咪，認真乖仔。
關楚耀今年在歌影視圈發展成績理想，尤其他有份擔演的電影《喜愛夜蒲2》有逾千萬票房佳績，令他一躍成為「千萬票房男星」，據悉不少導演亦有意斟洽Kelvin拍戲，而電視方面亦有新動向，令他喜出望外。事業發展理想，令他收入激增，今年大半年已有近百萬收入。
地產舖攞資料
由於Kelvin之前忙工作，甚少時間陪伴家人，故日前難得放假，便相約媽咪行街兼睇樓，認真孝順。日前下午，Kelvin與打扮甚潮的關母現身太古，兩母子先到便利店買飲品，再到地產舖睇樓，Kelvin向地產經紀索取參考資料，又不時問媽咪意見，十分投入。逛完地產公司後，兩母子到附近餐廳醫肚，過馬路時Kelvin輕扶母親，認真細心。他們在店內點了咖啡及蛋糕，期間仍研究樓價資料，愈傾愈興奮。醫飽肚後，Kelvin與媽咪行街，不過他冇選擇行潮店，反而陪媽咪逛海味店，兩母子在店內逗留十幾分鐘已有斬獲，並由Kelvin畀錢，相當乖仔。
目標住港島區
事後致電Kelvin，他坦承有意買樓榮升做業主，他說：「今年收入都唔錯，依家我同家人住，賺到錢梗希望可以同佢哋住得好啲，主要揀港島區，目標七百幾萬嘅樓。（好孝順喎！）要嘅，平時都少時間陪媽咪，所以同佢行街食嘢，仲買咗啲螺頭同乾瑤柱孝敬佢。（花費幾多？）近千元啦。」