JJ 30歲生日癡情送上門

自從被本報踢爆與樊少皇拍拖後，JJ一直懶理外間眼光，任憑男友連環被爆與前女友育有一對子女，及傳出早前於內地有其他女友，慘令JJ背負小三甚至小四罪名，不過，種種負面新聞絲毫未有令JJ動搖。

昨日正值JJ三十歲生日，亦是兩人拍拖後首個生辰，正在內地拍劇的樊少皇未能回港陪伴女友，只透過微博隔空送贈一張捧着一束紅玫瑰的照片，照片上綴有無數心心圖案，再配上「Happy Birthday」字樣。今年39歲的樊少皇流露出少男情懷，正所謂「橋唔怕舊」，JJ即時被氹到冧爆。

一提起男友，JJ即時冧爆甜笑。

生日前夕，JJ在友人的婚禮上接到新娘子的花球。

感動得眼濕濕

前日，JJ趁生日前夕出席友人婚禮，穿上白裙的她於下午2時獨自駕車由將軍澳寓所到九龍塘的婚禮場地，進場後，JJ熱情地攬實一對新人道賀，在婚禮上更數度感動到眼濕濕，眉宇間難掩恨嫁的心情。

JJ與新娘子傾個不停，在婚禮過程中被感動得數度眼濕濕。

出席完活動後，JJ即乘保母車往深圳。

當新娘子按傳統拋花球，恨嫁的JJ與一眾女賓客企在有利位置，剛巧花球不偏不倚地跌在JJ面前，全場即時拍手歡呼，含蓄的JJ即時露出甜笑，主動拾起花球後送給旁邊的女友人，歡呼聲繼續不絕，大家都認定JJ是下一個結婚幸運兒。離開婚禮場地，JJ喜獲兩名fans一早在車旁等候她，為她送上禮物及蛋糕預祝生日。

「見到佢已經開心」

及至昨日生日正日，JJ繼續出席公開活動，即時被傳媒取笑男友「平」賀生日，她說：「唔係，呢啲唔係用價錢衡量，佢喺青島冇得陪我，大家都做呢行明嘅，（男友送咩禮物？）未收到。（係咪速遞個人最好？）好呀！邊個生日唔想同身邊嗰個過。」JJ不諱言有時間會自己飛去內地探男友。當再問到JJ想有甚麼生日禮物，她不怕肉麻地說：「呢一刻見到佢已經好開心，物質上嘅我可以滿足到自己。（有咩滿足唔到？）你哋講咩呀？（你好鹹濕？）都唔知你哋講咩，情感上面每個人都需要同愛嘅人見吓面，啱啱拍拖都想見多幾面，依家好似網戀咁。」

揚言大把人追

被問到分隔兩地會否擔心男友被撬走？JJ信心十足地說：「佢擔心我多啲，好多男仔追我，（公開拍拖仲有？）都有少少，未結婚都有希望嘛，（你唔係認定咗佢？）認定咗呀！我都同追求者表達得好清楚。」冧爆地向記者透露男友知道後表示會對她更好。兩人愛到如此難捨難離，難怪JJ活動後隨即乘車往深圳出席活動，繼而秘密地「人肉速遞」往青島會男友，一於滿足地過三十歲難忘生日。

文、攝：追蹤組