栢芝拖孖寶哭爆姐弟情

張栢芝同父同母、感情深厚的細佬張豪龍，昨日於康樂園鄉村俱樂部迎娶比他年長五個月、並已懷有數個月身孕的化妝師女友周紫雯。向來行事低調的豪龍，為照顧大肚老婆同時亦不想為婚禮大事鋪張，昨選在俱樂部泳池邊舉行結婚派對，每位賓客只需約五百元使費，可謂相當經濟。

難忘一家聚埋

早上11時半，穿上桃紅色西裝打粉紅呔的栢芝，帶同兩個穿小禮服的寶貝仔與同母異父的家姐戴碧芝及碧芝女兒一同到賀。右手抱Quintus、左手拖Lucas的栢芝心情大好，展露燦爛笑容讓大家拍照，不過，Lucas見閃光燈閃個不停，故意鬼馬地轉身避鏡頭，相當搞笑。另外，栢芝早前捲入官司的父親鬍鬚勇及栢芝媽亦一早到場為兒子的婚禮作準備。

（設計圖片）

新郎哥豪龍只會說開心，身為家姐的栢芝雙手合十，多謝大家。

新郎哥豪龍和老婆於10時半乘坐全冇裝飾的房車低調抵達，新娘子在車內見記者拍照即露出甜甜笑容。婚禮派對由中午一直開到下午4時，據知栢芝於場內獻唱了多首感人歌曲，更上台講到她和豪龍的姐弟情，一度感動到淚灑當場。栢芝於婚禮上直言：「我好錫呢個細佬，佢好生性！」更表示有親手整禮物賀細佬新婚，栢芝透露昨天最難忘是因為細佬的婚禮而令到同父同母的一家五口齊齊整整聚在一起。

栢芝媽媽受訪時表示：「等今日等咗好多年，真係好感動，每一部分都感動。」

囝囝歌舞贈興

及至下午2時多，栢芝與噴了一頭金粉、穿西裝打金色煲呔、着金色鞋襪的豪龍出來見記者，栢芝大方地向記者說：「辛苦晒！」身邊的豪龍只懂不停說：「好開心！好開心！」要家姐代答大部分問題，講到婚禮內的情況栢芝說：「我哋有好正式嘅簽紙儀式，好正式o架！跟住就播新郎哥細個嘅片段，然後係同佢老婆點相識，之後就播我個仔細個唱歌跳舞啲片，後面好多小朋友，跟住大家就唱歌啦、上台表演啦！總之就係一個婚禮party。」

問到新郎哥有甚麼愛的宣言，豪龍繼續那一句：「好開心！」栢芝忍不住代答：「佢好緊張呀！（你送咗咩畀弟婦？）弟婦係咩呀？即係佢老婆？送晒我哋全家嘅愛，你睇我哋造型就知我哋好時尚，冇嗰啲豬牌、龍鳳，我諗送最大嘅支持同愛囉。」問到兩名愛子是否擔任花仔，栢芝笑說：「都唔算，Lucas着咗西裝，Quintus入到去冇耐就瞓咗，大合照都係瞓緊。」栢芝透露約有一百人參加婚禮派對，簽婚約儀式後小朋友到公園玩，有些人去游水，有些人休息，總之就各有各開心。

文、攝：追蹤組