李彩華孖脹爆田亮返香閨
桃花超旺的李彩華（Rain）與前男友分手不足兩個月，已正式投入新戀情，趁假期即返港會新歡「脹爆田亮」，日前本報收到讀者報料，指Rain與男伴在銅鑼灣歎日本私房菜，由於私房菜只接受預約，明顯兩人一早約定撐枱腳。據知，兩人為免戀情曝光，更要求坐較邊位置，當本報趕到上址，兩人已醫飽肚離開，春風滿面的Rain更一臉陶醉跟在「脹爆田亮」後面。
接埋阿媽
其後，化身「柴可夫」的新歡先去攞車，Rain則在附近買化妝品，手持戰利品的Rain一支箭衝上預先泊在門口的新歡車上，接住再到隔籬街接埋Rain媽，Rain媽甫見座駕駛到，即熟悉地開門上車，相信Rain早已帶新歡見家長。一行三人再直駛到Rain上月斥資1,600萬購入的渣甸山豪宅名門。本報翻查汽車登記，是一名姓鍾男子於2006年以50多萬購入。
兄弟相稱
本報致電Rain恭喜她蜜運中，Rain透露現已返內地拍劇：「早幾日趁放假返咗香港。」並以「兄弟」形容男方，Rain說：「我哋係好兄弟，識咗好耐，唔係拍拖，大家千祈唔好誤會，唔好阻住我啲桃花！」對於「兄弟」接埋其母，Rain說：「食完飯車我同媽咪去新屋睇裝修。」
採訪：追蹤組