Yumiko打唔沉嫁得還神

佢（Andy）突然求婚令我覺得好感動，冇諗過有男人喺自己咁唔靚嘅時候嚟求婚，原本醫生話我個傷會有後遺症，可能成世要用尿袋同埋唔可以行動自如，但佢喺呢個時候冇離開我，仲plan咗之後點照顧我。

從不埋怨彼此信任

我哋拍咗七年拖，嗰陣喺布吉醫院病床度諗，如果自己好番冇事會想同佢求婚，不過可能冇發生意外，我哋會因為七年之癢而散（大笑），其實我冇問過佢點解突然求婚，但佢喺我受傷呢段時間都冇離開我，仲好細心咁照顧我，所以經過今次意外對佢加咗好多分。

放大圖片	Yumiko對演藝事業仍抱有雄心壯志。	Yumiko笑言冇發生今次意外，她和男友或會因為七年之癢而散。

如果唔使拍劇嘅話我會盡量返香港陪佢，但有時拍劇一拍就兩、三個月，不過少見都好嘅，我哋每日都會通電話，傾下每日做啲咩，分享下心情。佢從來唔會埋怨我工作上嘅嘢，亦唔擔心緋聞。我都唔會過問佢嘅工作，一來佢化妝嘅藝人我都識，我覺得工作就係工作。

Yumiko現階段深感幸福。	Yumiko遭逢劫數，仍抱着樂觀心態迎接未來。	男友Andy（推車者）為Yumiko訂下連串「照顧計劃」。

「佢好似我嘅支柱」

我哋平時乜都傾，我覺得兩個人一齊最緊要係溝通，一段關係要維持，最緊要傾到偈。佢好似我嘅支柱咁，我有困難會搵佢訴苦，我有唔開心，講出嚟就冇事，所以我一定會搵佢講，反而佢係一個傳統嘅男人，我好少喺佢口中聽到佢呻，佢有唔開心會自己解決。

未有生B計劃

快將披嫁衣的Yumiko，坦言怕BB又嘈又難頂，故暫時仍未有生育計劃。

結咗婚之後我會繼續工作，我未試過有超過個半月嘅休息，我發現我愈來愈接受唔到呢種生活，覺得每日咁樣過好枯燥。我早喺兩年前已經同公司續咗約，未來嘅工作拍戲同唱歌都希望兼顧到，嚟緊有兩部電影傾緊，原本仲有一部關於跳舞嘅戲傾緊，不過受傷後唔可以拍，我又唔想用替身。我出碟嘅雄心仲喺度，想將受傷呢排諗嘅嘢放落隻碟度，一路都有同公司傾緊，公司畀我嘅自由度都幾大。

父母開到口恨抱孫

Andy都係呢一行嘅人，冇話唔想我留喺呢一行，除非有咗BB啦，不過我哋冇計劃生小朋友，我暫時未鍾意BB，試過去啲朋友聚會，有超過10個BB我就會覺得好嘈好難頂，呢啲生活未係我所想要，佢冇表示要生，反而父母前兩年就同我講恨抱孫，不過我同佢哋講唔想生住，咁佢哋話你唔想生就唔緊要啦。

跌一跌有個老公

沒有今次墮崖意外，Yumiko焉知非福，她更笑言：「點跌先跌到個老公番嚟o架！」

唔同人對於幸福嘅定義都唔同，例如每朝起身唔使做嘢，每日可以去high tea、shopping，但呢啲生活對我嚟講唔算幸福，我個人唔可以活得冇目標，現階段我覺得好幸福。

大難不死焉知非福

如果我唔係咁唔好彩受傷，邊會有人向我求婚咁幸福喎！換個角度諗，跌一跌得到個老公，又要跌到冇乜事唔會有生命危險，其實我諗咗好耐，點跌先可以跌到個老公番嚟o架！

口述：鄭希怡　　

筆錄：音樂組

Make up：Andy Leung@DN & Co.

Hair：Ziggie@La Mod Salon