祖兒效忠宣言：100周年都出席

樂壇天后容祖兒、謝霆鋒、古巨基三位英皇巨星，昨晚與一眾同門出席「英皇集團70周年誌慶晚宴」，祖兒身穿一襲性感黑金色晚裝，大騷透視小蠻腰，戴上巨型耳飾的她更自嘲頭大：「我個頭本身大，加埋對耳環就好重！」

無暇陪男友過節

問到祖兒會否出席將來英皇集團80周年誌慶？她即發表「效忠宣言」，揚言甘為公司再長簽「賣身契」：「點只80周年？我可能100周年都出席！（唔怕扣人工？）我唔係咁計算嘅！」被指是億萬富婆的她更偷笑說：「今日咁開心，你哋講幾多都冇所謂！」

霆鋒大方回應早前與張栢芝及囝囝游水一事。	冼色麗性感撐場。	Twins盛裝出席，齊齊表示願為英皇簽長約。

祖兒透露將忙於工作無暇留港慶祝中秋節，問未能與男友劉浩龍人月兩團圓，她指工作為上，又擺出一副冧樣拍記者膊頭笑說：「唔答啦！」

古巨基與鄺美雲老友聚頭，開心合照。	孫佳君最近簽約英皇，昨晚自然成為座上客。	大忙人張家輝抽空賀舊公司70周年慶典。

Twins跟容祖兒一樣對英皇忠心耿耿，她們坦言：「無論80年、90年、100年我哋都可以出席，只要公司肯簽我哋，我哋幾時都肯簽。」但她們以商業為理由拒透露跟英皇還有幾耐合約。

基仔「拋窒」記者

霆鋒則心情大靚回應早前與張栢芝及囝囝游水一事：「依家做咩都係為對囝囝着想！」他又堅稱與栢芝不會復合，又以「前妻」稱呼栢芝：「不過佢好好，肯畀我見對囝囝，但大仔Lucas仲未知咩係離婚，成日都對住我講『Ba Ba can you stay？』」

古巨基則大讚英皇集團：「70周年好勁，希望80、90周年都可以參與！」曾多次被老闆楊生催婚，以及撮合與緋聞助手Lorraine世紀合照的基仔更「拋窒」記者說：「我係小職員，楊生今晚（昨晚）唔會搞埋催婚呢啲小事，如果你哋叫得郁楊生，我乜都肯做！」

文：音樂組