邊搞離婚邊歎茶 姚君達：感情好咗 隨時再結
米蘭站主席兼行政總裁姚君達與結婚廿載的太太爆出離婚，昨日兩人一同到酒樓飲茶，大方承認離婚。
昨早約十一時，姚君達與太太於尖沙咀一酒樓歎茶，現場所見，兩人點了一隻烚雞蛋兩份食，之後姚生自顧地看報紙時，姚太亦探頭張望內容，一份報紙兩份睇，姚生又不時為太太斟茶，種種行徑，令人不敢相信他們是一對正在搞離婚的夫婦。
記者上前直問他們是否正在搞離婚？姚生大方承認：「係，依家係暫准離婚令。（點解你哋關係咁好一齊飲茶？）我哋依家日日都一齊食早餐、一齊食晚飯、仲係一齊住，唔知點解，我哋決定離婚後，反而關係紓緩咗、開心咗，仲係好朋友。」至於離婚原因？姚生說夫妻間一定有不開心，但否定有第三者，他笑說：「如果有第三者，一定冇得掹，依家大家決定離婚，但將來我可能會再同佢結婚。」他們育有的一對子女，長女17歲，細仔15歲，亦已知道父母離婚的事，至於姚太亦表現大方，記者要求兩人合照時，姚太更翹實姚生，證明離婚後亦是好朋友。
