劉蔚萱被指放料 崩潰嚎哭
「神獸天使」劉蔚萱（Jenny）疑被導演張永豪施虐，引來全城哄動！事件曝光後Jenny即被製作部照肺，交代事件來龍去脈。據知過程中有高層未有慰問之餘，更質疑她是拍片者，令Jenny感孤立無援，當堂崩潰嚎哭！
Jenny日前拍攝新劇《心路GPS》一場戲份時，久久未達導演張永豪要求，有指張永豪見狀即拿起內有田雞的膠袋笠她頭部，並使力推她撼頭埋牆，該片段於網上曝光，不少藝人先後發言力撐Jenny。
事件發生後，無綫製作部及藝員部分別召見Jenny，要求交代事件。據知，製作部高層未有安慰，劈頭第一句便問Jenny：「條片係咪你拍嘅？」令Jenny大感冤枉，當場崩潰嚎哭。雖然製作部高層曾勵珍已公開否認與張永豪是親戚關係，但據張永豪的Facebook現狀一欄，卻透露二人是親戚，似乎高調向外宣布有人撐腰。
樂易玲讚對答得體
負責藝員部的樂易玲昨日透露已見過Jenny：「佢係唔開心，不過都要讚今次佢處理件事好好，對答得體。佢唔開心係聽到得罪珍姐就以後唔使撈嘅傳聞，我唔相信珍姐會咁做，總之藝員部會保護Jenny工作環境安全。」樂小姐又稱看過該段片後感不安，寄望製作部日後多體諒藝人。
而無綫外事部副總監曾醒明昨日透露已收到1個電話、40個電郵投訴，直指張永豪濫用職權，暴力對待Jenny。至於Jenny與張永豪昨日未有接聽電話，未知是否收指示封嘴，而Jenny昨晚會繼續為新劇開工。
張智霖指極端教戲
身在電視城拍攝劇集《衝上雲霄Ⅱ》的張智霖亦為Jenny抱不平，他認為不該以極端手法教戲，除嚇怕新人，效果更是適得其反。與Jenny熟落的「天使妹」陳宛蔚前晚出席新戲宣傳時表示：「佢外國返嚟，中文唔太好，可能溝通上出現問題。」在旁的錢國偉則表示教新人會動口不動手：「呢件事好多嘢係羅生門，各有各原因，不過我同導演張永豪就唔熟。」
文：影視組