陳法拉最憎發財
「花名」完全表達一個人特性或性格，相信不少人都會被別人改「花名」，陳法拉透露她從小到大就被叫「發財」，但她卻討厭這「花名」，還曾因而出手打人。而身材高挑的模特兒們，少不免都被叫「高妹」！
護膚品牌活動
陳法拉：「讀幼稚園嗰時，啲同學嗌我做『發財』，同法拉個音好接近，由細笑到大。我就成日追住佢哋嚟打，點知有次仆親，仲整爆咗媽咪車畀我條褲，好唔開心！」
汪圓圓：「唔想講！曾經有朋友嗌我做『豬豬』，因為話我皮膚好白，好似啱啱出世嘅豬仔！唔要做豬，唔鍾意！」
依波路錶旗艦店開幕
陳慧琳：「我有兩個花名，一個叫高妹，另一個叫薯條，因為一直又瘦又高，啲人覺得好似薯條咁。」
趙雅芝：「我同妹妹年紀好近但花名好唔同，妹妹白淨，畀人叫佢做牛奶，反而我細個男仔頭皮膚黑，個個叫我做朱古力，同埋我好鍾意游水，啲人會叫我做美人魚，妹妹比較文靜就叫洋娃娃。」
Fancl護膚品活動
Mandy Lieu：「啲人叫我衞生官，因為我有啲潔癖，去朋友屋企見到佢哋亂，會忍唔住幫佢哋執，所以知我去佢哋屋企，就會自動自覺執定嘢。」
手機電腦活動
林莉：「我個花名叫『茶Dee』，其實係潮州話大弟咁解，因為媽咪生完我之後想要多個細佬，所以就叫我做大弟，最後真係有個細佬！」
李彩華：「我花名係『豬』，到依家媽咪大街大巷都會咁叫我，我都驚畀朋友聽到。」
時裝騷
陳嘉容：「我個花名叫高妹或阿四，因為屋企排第四。做家務我都係排喺星期四。」
時裝店開幕
蔡卓妍：「我以前讀書畀人叫孖辮妹，因為我到中三都係紮孖辮返學，我天生鬈頭髮，又趕住返學，所以紮辮最方便，但頭髮又唔夠長，所以要紮兩條辮囉！」
泳兒：「我細個無花名，反而入咗行，用咗泳兒呢個名之後，經常畀人改花名，例如叫我泳衣、泳池。」
詩雅：「因為我有個家姐，所以屋企人由細到大都會叫我做阿妹，連細佬都會叫我做阿妹。」