鄧紫棋開騷擺Psy上台

年屆34歲的韓國男歌手Psy近月將新歌《江南Style》MV放上網與歌迷分享，由於其舞姿非常搞笑，捧着大肚腩的他不斷將手上下左右fing，又趷籮扭pat，4分鐘MV笑位勁多，故吸引不少網友爭相欣賞，短短50日已有過億點擊率，有網友以「騎呢舞」形容Psy舞姿。

鍾意佢個大肚腩

昨日穿上四吋窩釘高踭鞋出席活動的G.E.M.，被指模仿力超強，早前她在紅館處女騷獻唱神曲《忐忑》，問到她有否留意Psy？她說：「有睇過佢首歌MV，好鍾意佢個大肚腩，好正，舞姿夠獨特。（網友話騎呢？）似公雞。」G.E.M.坦言每次睇《江南Style》MV都笑爆，她說：「佢個樣幾搞笑。」由於她將於明年四月在紅館開騷，問到會否將元素放入個唱中？G.E.M.說：「諗諗，如果夾到可以搞笑吓，我個人搞笑慣。」

王祖藍（左起）、阮兆祥與李思捷扮嘢最叻，都有意學Psy演出。

杜如風（左）與G.E.M.出席活動齊齊行騷。

阮兆祥啱晒身形

此外，向來緊貼潮流的福祿壽對Psy的騎呢舞亦「虎視眈眈」，身處加拿大的李思捷昨接受電話訪問，直認福祿壽有意模仿MV《江南Style》娛賓，並笑謂阮兆祥是扮演Psy的不二人選，他說：「佢身形啱，哈哈！其實呢隻歌我個幾月前已有留意，覺得好出位，好少咁嘅身形嘅人可以跳到咁活躍嘅舞步。其實隻舞難度唔高，係個創意犀利，我最鍾意手搭手然後fing吓fing吓嗰個動作。」

王祖藍亦說Psy搞笑：「佢好叻，將有型同搞笑擺埋一齊，不落俗套，堪稱搞笑嘅典範，係高級喜劇。最鍾意佢嘅招牌動作騎馬，全世界可以跟住跳，冇難度，但又夠搞笑。（福祿壽真係會扮佢？）我覺得應該學習佢嘅精神，佢已經係神級，冇辦法超越。」

文：音樂組