田雞撐星爺糧準：冇欠我斗零
電影人田啟文（田雞）前晚出席電影首映禮，與周星馳合作多年兼好友的田雞，對於星爺遭前女友于文鳳入稟法院追數7千萬佣金，他力撐星爺一向準時出糧，從未欠過斗零人工。
星爺與拍拖13年的前女友于文鳳於2002年簽訂合約，女方擔任他的財務顧問，星爺每月會付她2萬至5萬9千元不等的費用，亦曾口頭承諾會將投資所得除稅後利潤的一成給她作佣金。由於星爺名下未出售的獨立屋市值8億，于文鳳認為可分取一成佣金，而星爺亦答應，但星爺只付了她1千萬後就一直未有付款，故于文鳳日前入稟法院向他追討7千萬佣金及相關損失。
田雞和o靚模鍾蕙芝前晚出席電影《轟天猛將2》慈善首映禮，提到星爺遭前女友于文鳳入稟追數，田雞坦言與星爺有聯絡：「我電話未停過，好多人打嚟，我即刻熄機，亦專登唔打畀佢，如果佢講嘢我咪好唔得閒？（真有其事？）我都係從朋友同報道得知呢件事。」
唔知一腳踏兩船
田雞在星爺設立的星輝公司打了13年工，問覺得星爺為人是否吝嗇？他說：「好難講！至少佢冇欠我哋斗零！該畀嘅都畀晒，出糧亦都好準時，內裏可能有好多嘢都唔定。」有傳指星爺同一時間與莫文蔚、于文鳳拍拖，田雞表示不知情：「我雖然識咗佢好耐，但係都唔會知佢幾時會識得女友同拍拖o架！」首映期間，有男途人做不文手勢，將手指穿過褲襠伸出，以手指扮下體，嚇得在場人士目瞪口呆，經過一番擾攘後才離去。
另外，黃百鳴接受有線節目訪問，重提當年找星爺拍攝《家有囍事》時，遭對方「獅子開大口」索價八百萬片酬。他又爆張國榮氹張曼玉有一手：「張曼玉喺戲中有一幕着嗰件衫胸口有兩個大雪糕筒，佢唔肯着，導演都搞佢唔掂，但最後竟然畀哥哥氹掂咗，一有哥哥喺度佢咩都肯做，哥哥喺現場係有鎮場作用。」
文：影視組